Dortmund an la beidawng lo

Borussia Dortmund chuan Bayern Munich lak aṭangin Bundesliga title laksak an la tum ngam zel. Pathianni zan khan Dortmund hian an mikhual VfL Wolfsburg chu 6-0 a sawpin Bavarians nena an inkar chu point khatah an tizim leh ta.

Bundesliga match 31 an khelh tawh a, hmabak match pathum ṭheuh an la nei. Hmahruaitu Bayern leh Dortmund te hi match khat chetsual zeuha dinhmun inthlak thei reng an la nih avangin season tawp thlengin a hmuhnawm dawn.

VfL Wolfsburg lakah Dortmund tan Jude Bellingham leh Karim Adeyemi ten goal khat ve ve an khung a, goal hnih dang hi Sebastien Haller leh Donyell Malen te khung a ni thung.

Edin Terzic enkawl Dortmund hi an boruak a ṭha rih viau - Pathianni zan Signal Iduna Park-a inkhel pawh hi mi 81000 zetin a hmunah an en a, a tir aṭanga a tawp thlengin fans thawm a ṭha hle, mikhual tan lenluh a châkawm lo ang.