Mbappe hoin PSG an chak

Lionel Messi an hrem a, hliam vangin Neymar a chawl mek bawk - South American player ṭha pahnih awm lo mah se Paris saint Germain hian Kylian Mbappe an la nei, an mikhualna ramah Troyes chu 3-1 in an hneh.

Pathianni zan Ligue 1 inkhelah PSG tan Mbappe chuan minute riatnaah goal a khung a, second half-ah Vitinha hmangin an khung belh. Troyes lamin Xavier Chavalerin hmangin sut ṭhen mah se hun tawp dawnah Fabian Ruiz chuan PSG chakna a nemnghet.

Tun hnaiah PSG hi an khel ṭha tawk lo - Troyes an tlawh hma an match hnuhnung paruk aṭangin vawi thum ngawt an tlawm, tunah erawh an chak leh ta a, khelh hmabak pali an la neihah point sarih an hmu thei a nih chuan a vawi 11 nan French title an la ang.

Chak lo Troyes erawh tla thei dinhmunah an la ding chhunzawm zel, a him china awm Auxerre an phak lohna chu point 12 lai a nih tawh avangin French football inelna sang berah an inhamtan zawh a rinawm tawh loh.

Inkhel dangah Lyon chuan Montpellier 5-4 in an hneh, he inkhel hi Ligue 1 chanchinah hriatreng a ni tawh ang. Montpellier tan Elye Wahi chuan goal li tehmeuh khung mah se a team chakpui nan a tawk zo lo.

Lyon tan Alexandre Lacazette pawhin goal li a khung, a goal hnuhnung ber hi minute 90+10'-naa a khung a ni hial, an goal khat dang hi Dejan Lovren khung niin mualneitu Lyon chuan point thum hlu tak an hlawh chhuak.

Hun tawp dawn thlengin team pahnih hi 4-4 in an inhnehtawk. Mahse, Christopher Jullien chuan Lacazette ti tluin penalty a chawi. VAR hmangin thil thleng hi ennawn a ni a, penalty pek niin Lacazette chuan chakna goal khung nan a hmang.

Arsenal striker hlui Lacazette hian tun season Ligue 1-ah goal 24 a khung tawh a, goal khung hnem lamah Paris Saint Germain forward Kylian Mbappe nen an intluk mek, mimal chawimawina dawng tur inum boruak pawh a la nung hle.