Lionel Messi leh Argentina tan chawimawina

Infiamna hrang hrang huap zo Laureus World Sports Awards sem chhuah a ni a, chawimawina ngaihhlut ber Sportsman of the Year chu Lionel Messi kutah hlan a ni a, Team of the Year pawh Messi awmna Argentina kuta awm a ni bawk.

Messi hian Qatar World Cup-ah khan captain armband hreng chungin an ram a champion pui a, goal sarih khungin player ṭha ber chawimawina Golden Ball dawngin an ram hi a champion pui a ni.

Football player zingah Messi hi Sportsman of the Year dawng thei awmchhun a la ni, kum 2020 khan he chawimawina hi a lo dawng tawh bawk. Kum khata Sportsman of the Year leh Team of the Year dawng thei hmasa ber a ni bawk.

Messi a lawm

Football huangah chuan mimal chawimawina hrang hrang a dawng hnem tawh a, team tan nomawi a hlawhchhuak hnem bawk. Infiamna peng dangte nena huang khata teh an nihnaah erawh Messi hian award a la dawng tam lo - football khel mi tan thil harsa a ni.

Mahse, footballer tana dawn theih loh ang maia ngaih kha ṭum hnih ngawt a dawng thei. Messi chuan, "Paris khawpuiah Laureus World Sports Awards sem a ni a, he khawpuiah hian kum 2021 aṭang khan kei leh ka chhungte kan cheng.

"Keimah vang chauha award hi dawng thei ka ni lo, ka teammate-te vanga dawng ka ni. Argentina chauh ni loin Paris Saint Germain tana ka khelhpui te vanga dawng thei ka ni," tiin mimal thawhchhuah ni loin team thawhchhuah a ni tih a sawi.

Sportsman of the Year dawng tur hian PSG tana a khelh pui Kylian Mbappe, Formula 1 champion Max Verstappen, French Open champion Rafael Nadal, NBA champion Golden State Warriors thiampuipa Stephen Curry leh pole vaulter Armand Duplantis te a khum.

Messi tana chanchin lawmawm dang chu Team of the Year an dawng tel kha a ni ang. Argentina hian kum 1986 hnua a vawi khat nan World Cup nomawi a chawi a, final inkhel hmuhnawm leh hriatreng hlawh turah France an hneh.

Award dang

Mipa tennis player chhuak thar ṭha zet mai Carlos Alcaraz chu Breakthrough of the Year atan thlan a ni. Spanish rawlthar hian kum 19 mi chauh ni chungin US Open nomawi a chawi a, world number 1 ni thei naupeng ber dinhmun a luah hial bawk.

Alcaraz hi tun dinhmunah world number 2 a ni mek, hliam vangin nikum tawp lamah a inkhel tam tawk lo. Tun hnaiah erawh ṭha takin a khel leh tawh a, kar thara world ranking chhuak tharah chuan a chung berah a awm leh tawh dawn a ni.

Euro khelh laia lungphu chawl vanga tlu, a hnua football khel pangngai leh thei ta Christian Eriksen chu Comeback of the Year atan thlan a ni. Denmark international hi hliam a tawrh laia a khelhna Inter Milan tan Serie A khel thei tawh lo mah se Manchester United tan a khel mek.

Infiamna kaltlanga thil ṭha ti chawimawina Sport for Good Award chu 'TeamUp' hnenah hlan a ni. TeamUp hi Barcelona striker Robert Lewandowski huaihawt a ni a, Poland captain hmalakna hian indona avanga naupang chanhaite chhawmdawl an ni.

Hmeichhe lamah Shelly-Ann Fraser-Pryce chu Sportswoman of the Year atan thlan a ni thung. Fraser-Pryce hi kum 36 mi a ni tawh, hmeichhe 100m intlansiakah hlawhtlinna a chan hmasak aṭanga kum 13 a lian hnuah World Athletics Championships-ah gold medal a la leh a ni.