UCL semifinal-ah Derby della Madonnina

Derby della Madonnina hi Derby di Milano tih a ni bawk a, Mizote tan chuan Milan Derby tihin a fiah ber. Italian club lian pahnih AC Milan leh Inter Milan hi Europe-a club inelna sang berah Champions League semifinal-ah an inhmachhawn dawn.

Milan club pahnih hian stadium an inṭawm a, zanin dar 12:30-a an inkhelhna tur hi San Siro niin May 16, Thawhlehni zana an inkhelhna tur pawh San Siro tho a ni. Zanin an inkhelhna tur hi Milan tan 'home match' tur a nih avangin supporter an ngah zawk ang.

Italian club nge nge

Champions League semifinal-a Milan Derby hi mi ṭhahnem tak ngaihdanah chuan fixtures vang a ni a, club pahnih hi semifinal-a inhmachhawn em tur chuan an ṭha tawk loah a ngai.

Amaherawhchu tun season UCL thlir chuan Italian club-te an che ṭha hrim hrim. Club lian pathum Napoli, Milan leh Inter ten quarterfinal an thleng vek a, Serie A champion thar Napoli hnehtu pawh Milan an ni.

Serie A club zinga UCL knockout stage thleng pha lo, Juventus pawhin Europa League semifinal an lut tho. Europe-a club inelna ang ber dawttu Europa League semifinal-ah pawh Italian club pahnih tho an lut a, Juventus bakah hian Jose Mourinho kaihhruai AS Roma an tel bawk.

Thawnthu hlui

Champions League semifinal-ah Milan Derby hi hmuh a ni tawh a, 2002-03 semifinal khan an inhmachhawn. Hetih hunlaia Milan player ho hi an hraw hlawm hle - Dida, Alessandro Nesta, Paolo Maldini, Andriy Shevchenko leh Filippo Inzaghi te an ni.

Inter lamah pawh Toldo, Fabio Cannavaro, Marco Materazzi, Javier Zanetti, Hernán Crespo leh Álvaro Recoba te an ni. Hetih hunlai hian away goal rule a la awm a, first leg-ah 0-0 a an inhnehtawk hnuin second leg-ah 1-1 a ni leh a, away goal rule hmangin Milan an vannei ta zawk.

Final-ah pawh Italian club pahnih tho an inhmachhawn a, Milan-in Juventus an hneh. Milan hi vawi sarih ngawt European champion an ni tawh a, Real Madrid dawta champion ngun ber an ni.

Semifinal chu

Milan club pahnih hi Serie A lamah Napoli hnuaiah an awm a, champion tur a chian tawh bawk avangin club pahnih tan tun ṭuma an inkhel tur hi a pawimawh berah a ngaih theih.

Milan hian an match hnuhnung berah Lazio 2-0 in an hneh a, mual sirah Theo Hernandez-a goal nawr a na hle. Rossoneri tan final thleng turin an chak dan bera an khelh a ṭul a, Inter chak lohna laia an chhut theih a ngai bawk. Quarterfinal-ah Milan hian Napoli lakah hnehna an chang a, Inter lakah an game ṭha tak an chhunzawm a ngai.

Kuminah Inter an che ṭha a, Serie A match hnuhnung paliah an chak vek. An chak satliah lo, goal 14 an khung bakah goal khat chiah an chhuah. Manager Simone Inzaghi-a'n duhthlan tur a ngah, midfield-ah Marcelo Brozovic leh Hakan Calhanoglu te inkarah duh thlan tur zawk hriatthiam a har a, chutiang bawkin Romelu Lukaku leh Edin Dzeko te pahniha bul ṭan tur zawk pawh thlan thiam har tak a ni ang.

Milan coach Stefano Pioli chuan, "Napoli lakah match hnih ṭha takin kan khel a, kan game ṭha tak hi chhunzawm zel kan duh," tiin Inter hneh ngei an tum thu a sawi.

Inter coach Simone Inzaghi chuan, "Semifinal khelh hi kan phu a, kan duhthusam hmun chu thleng. Bayern leh Barcelona te awmna group kan paltlang a, kan fan-te nen kan thawh hona a ṭha. Tun hun thleng tur hian kan thawkrim a, tawp mai kan tum lo," tiin a sawi ve bawk.