Brighton hnehtu Everton beiseina a nung
Premier League aṭanga la tlahniam ngai miah lo hi team paruk an awm - chung zingah chuan Everton an tel. Toffees hi an dinhmun a ṭha lo a, tla mai thei dinhmunah an ding, an beiseina erawh a la mit lo.
Everton hian Thawhṭanni zan khan Brighton & Hove Albion khelmual Amex Stadium chu 5-1 in an luhchhuah a, table-ah 17-na dinhmun an luah. Tla thei china awm Leicester City aia an sanna chu point hnih chauh a la ni thung.
Arsenal, Liverpool, Manchester United, Tottenham leh Chelsea te hi Premier League aṭanga la tlahniam ngai lo an ni a, anmahni ang bawka an record ṭha tak chhawm nung turin Everton hian thapui an thawh a ngai, an hmabak chu Manchester City an ni dawn.
Goal a sur
Brighton hian season an hmang ṭha a, an khelmual Amex Stadium hi mikhual tana inkhelh harsatna hmun a tling. Mahse, point mamawha tuihal Everton an chefuh tlat, minute khatna lek aṭangin a khat mawi tawkin a tawp thlengin an khung.
Abdoulaye Doucoure leh Dwight McNeil ten goal hnih ve ve an khung a, goalkeeper Jason Steele chuan anmahni lamah goal khat a tilut palh bawk. Brighton goal neih chhun hi Alexis Mac Allister khung a ni thung.
Bul an ṭan fuh loh avangin Brighton lamin chawlhlawk hmain goal thum an chhuah hman, coach Roberto de Zerbi-a'n player pali siksawiin inkhel kalhmang a thlak a, substitute Evan Ferguson chuan woodwork vawi hnih a tih per bakah Mac Allister-a'n a tih per bawk, goal hmaah an vanduai.
Nunna chu
Tun hnaiah Everton hi match sarih chhung chak ni hmel hmu lo an ni a, fans ṭhenkhat beidawng tawh mah se beidawng lo tam takin Brighton khelmual an pan, an beisei phak baka result ṭha an neih avangin Sean Dyche a lawm hle.
Everton manager Dyche chuan, "Arsenal kan hneh loh thu khan thil sawi ka nei a, hmasawn ngaihna lai pathum kan nei tih ka sawi. Chungte chu kan ti hlawhtling thei ta niah ka ngai, kan inkhel entute chuan he team hian theihna a neihzia an hmu ang.
"Team chhungah hian nunna chu a la awm," a ti. Real Madrid nena inkhel chau Manchester City lakah point hmuh an tum leh dawn tih a sawi a, chumi hnuah Wolves leh Bournemouth te nen an la inkhel leh dawn a ni.
Inenfiah a ngai
Manchester United an hneh hlim maiah Brighton an mualpho a, season thara European football khelh an duh a nih chuan De Zerbi naute tan chetsual chhunzawm zel a rem dawn lo - Pathianni zanah champion la beisei Arsenal an lenchilh ang.
Seagulls coach De Zerbi chuan, "Tihsual lian tak kan nei a, chu chu kan rilru puthmang fuh tawk lo kha a ni. Kawng hrang hrang khan a hniam leh hnuhnung zawk kan ni zel, kan tum ram thleng tur chuan hetianga tihsual neih nawn a remchang lo," a ti.
Brighton hi pasarihna an la ni a, point 55 hmuin an chunga awm Tottenham Hotspur aiin point hnihin an hniam zawk - an point tlem rih mah se match hnihin an la khel tlem zawk - Champions League beisei ngam chiah lo mah se Europa League khel turin kawng a la zau.