Foxes an tla dawn...?

Khawvel barakhaihin Premier League champion an ni a, hun rei a liam hmain Leicester City chu English football inelna sang ber aṭanga tla thei dinhmunah an ding leh ta reng mai, inhamtang turin midang chetsual an chan a ngai ta.

Fulham khelmualah Foxes hi 5-3 in an tlawm. Mualneitu Fulham tan Willian leh Tom Cairney ten goal hnih ve ve an khung bakah Alves Morais-a'n goal khat a thawh. Foxes tana Harvey Barnes goal hnih leh James Maddison khungin awmzia a nei phak lo.

Leicester midfielder Maddison chuan, "Kan tana inkhel pawimawh tak a ni a, bul kan ṭan fuh loh chu thuhran ni se kan beih let dan a na thei tak lo kha pawi ka ti. Premier League hi chu a harsain a hautak tih ka hria, chutihrualin hnehna chan chakin kan tuihal tawk lo a ni," a ti.

England international chuan sawi zawmin, "Kan tuihal tawk lo tia ka sawi hi ṭhenkhat tan hriat a nuam lo mai thei, kan theihna sang ber angin kan khel chhuak tawk lo a, a bik takin goal kan nawr na tawk lo," tiin a sawi.

Chawlhlawk an hman laiin Foxes ṭantuten an team hi an auel hum hum a, an hmalam ngaihtuahin an thaw a pik tih a chiang. An hmabakah Liverpool, Newcastle United leh West Ham te an la awm, a awlsam dawn lo tih a chiang.