GSW hnehtu Lakers dinhmun a ṭha
Los Angeles Lakers chuan NBA Western Conference semifinal lut turin match khat chauh an mamawh ta. Nimin zing inkhelah Lakers hian Golden State Warriors chu 104-101 in an hneh a, best of seven series khelh turah 3-1 in an kal fal ta.
May 11, Ningani zing dar 7:30-ah game 5 an khel leh dawn. NBA champion lai Golden State tan an beiseina chhi nung turin an chak ngei ngei a ngai dawn - Chase Center-ah inkhel hmuhnawm chhawpchhuah a ni ang.
Nimin zing inkhelah team pahnih an inbei tawk hle a, minute khat lek awmah pawh point khat lek lek bakin an inhlat lo, a tawpah erawl mualneitu Lakers an chungnung, quarter hnuhnung bera point 15 zet neitu Lonnie Walker chu an chakna hnar a ni.
Los Angeles khawpuiah Warriors an khel ṭha viau a, quarter hnuhnung ber khelh hmain Stephen Curry leh a ṭhiante hian 84-77 in hma an hruai. Mahse, quarter hnuhnung ber bikah point 10 ngawta an tlem zawk avangin an tlawm.
Lakers tana point 27 neitu LeBron James chuan, "Lonnie Walker khan theihna sang tak a nei tih ka hria a, inkhelh hma leh inkhelh lai pawh khan nuamti taka khel turin ka fuih. A nihna takah chuan tun inkhelah chuan ani hian min chakpui a ni
"Inkhel kha kan thlir kir a nih chuan engkim kan thunun bik lo tih a hmuh theih. Chuvangin tunah hian kan la chak tlang lo, chesual thei reng kan la ni. Game 5-ah hian kan ṭhat dan taka kan khel chhuak thei a nih erawh chuan kan tlang thei ang," a ti.
Champion lai Warriors tan Curry chuan triple-double (31 points, 10 rebounds & 14 assists) a nei a, mahse team chak pui nan a tawk zo si lo. Chase Center-ah chuan point tam zawk neih a tum ngei ang.
Nimin zing inkhel dangah Miami Heat chuan New York Knicks 109-101 in an hneh a, anni pawh hian best of seven series-ah 3-1 in hma an hruai mek. An chak theih nan point 27 a neih baka assist vawi 10 latu Jimmy Butler a thawhhlawk hle.
Team pahnih hian May 11, Ningani zing dar 5:00-ah game 5 an khel dawn. Miami Heat tan chak tlang turin hnehna chan leh a tawk a, Knicks erawh an chak lo leh a nih chuan tun season NBA atan an zinkawng a tawp chhunzawm nghal ang.