Novak leh Acraraz inthlauhna point 5 chauh

Mipa tennis thuneitu sang Association of Tennis Professionals (ATP) chuan Thawhṭanni zan khan world ranking thar a tichhuak a, a chung berah Novak Djokovic a la awm chhunzawm zel.

Serbian star hi pakhatna ni mah se a dinhmun erawh a him lo hle, pahnihna Carlos Alcaraz nen an inkarah point nga chauh a awm. French Open hmain Alcaraz hi a chung berah a lawn chho hman ngei dawn.

French Open inbuatsaih nan Italian Open an khel dawn, he inelnaa champion lai chu Djokovic a nih avangin nomawi chawi leh pawh ni se ranking point hmuh belh tur a nei hran lo, a ranking point neihsa a humhim a ngai zawk.

Alcaraz erawh season hmasa khan Italian Open-ah hian a inlan lo, tun inelna hi a hmachhawna match khat lek pawh a khel a nih chuan a tlem berah point 10 tal a hmuh belh dawn - Paris khawpuiah chuan Alcaraz hi world number 1 a ni hman dawn tih a chiang.

Ranking sang zual 10 zingah chuan Taylor Fritz chu 10-na aṭangin pakuanaah a tlahniam a, ani hi Canadian tlangval Felix Auger-Aliassime nen an dinhmun a inthlakthleng ta chiah.

Madrid Open final-a chak lo ta zawk Jan-Lennard Stuff chuan nasa takin hma a sawn. German tlangval hian a hmaa awm player 37 ngawt a tlanpel a, world number 28 dinhmun luahin tennis a khelh hunchhung a tawn san ber ṭum a ni.