Championship a zo; Playoff khel tur a hriat ta A tawp zanah Sunderland-in Millwall an lehpel

English football-a inelna sang ber dawttu Championship chu Thawhṭanni zan khan khelh zawh a ni a, playoff khel inchuh boruak a sang hle. Inelna tawp zan hian Millwall, Blackburn Rovers leh Sunderland ten hmunruak pakhat an inchuh a, Black Cats an vannei ta ber.

Championship champion Burnley-in season khar nan Cardiff City an sawp a, pahnihna Sheffield United-in Birmingham City 2-1 in an hneh bawk. Clarets leh Blades te hian season tharah Premier League an khel dawn. Hetihlai hian table hnuai lama awm club pathum Reading, Blackpool leh Wigan Athletic te chu League One-ah an relegate.

Playoff chu

Championship aṭangin team pathumin Premier League an khel dawn a, a sang pahnih an tlin nghal laiin hmunruak pakhat dang hnawh khat tur erawh playoff hmangin an zawng ṭhin.

Playoff hi pathumna aṭanga parukna ten an khel ṭhin. Match hnuhnung ber khelh hma hian Luton Town, Middlesbrough leh Coventry City te chu playoff khel turin an dinhmun a ṭha tawh. Chutihrualin Millwall, Blackburn Rovers leh Sunderland ten hmunruak pakhat hi an inchuh avangin boruak a la sang hle.

Playoff semifinal hi May 13-14, 2023 hian first leg khelh a ni ang a, second leg hi May 16-17, 2023-ah khelh a ni ang.

Inlehthalna

Millwall-in match hnuhnung ber khelh hmain parukna dinhmun an hauh a, an mualah khel mah se an khingpui hi playoff khelh beiseina nei Blackburn Rovers an ni.

Hetichung hian Millwall-in 'The Den'-ah bul an ṭan ṭha a, Duncan Watmore hmangin minute riatna lekah an khung. Rovers tan Adam Wharton-a'n minute 22-naah khung ve bawk mah se Millwall-in Watmore (37') leh Oliver Burke (39') te hmangin first half-ah an khung belh a, halftime-ah 3-1 a ni.

Playoff khel turin Millwall dinhmun a ṭha a, mahse second half-ah inlehthalna a thleng. Blackburn-in Joe Rankin-Costello hmangin minute 51-naah siphurh an sut ṭhen a, Ben Brereton Diaz-a goal hnih hmangin mualneitu an lehthal zui a, 4-3 in inkhel a tawp.

Blackburn-in hnehna an chan hian Millwall chungah an awm a, Millwall tan playoff beiseina a tawp. Chutihrualin Sunderland-in an khingpui Preston an hneh erawh chuan Blackburn hnehna chan hian awmzia a awm lo thung.

Black Cats-in first half-ah Preston lakah goal khung lo mah se second half-ah Manchester United aṭanga loan hmanga an hawh Amad Diallo-a'n goal hmahruai khungin Alex Pritchard leh Jack Clarke ten an khung belh.

Tony Mowbray kaihhruai Sunderland-in Blackburn puihna zarah playoff an khel dawn a, table-a pathumna luahtu Luton Town a hmachhawn ang.