Forest tan point 3 hlu bik

Nottingham Forest chuan anmahni ang bawka Premier League aṭanga tlak hlauhawma ding Southampton chu 4-3 in a hneh a, Thawhṭanni zan league match hi 'Cup final' ang mai ni.

City Ground-ah goal sarih ngawt a lut a, goal khung tam zawk Forest hi nuam sain an awm lo. Mualeitu hian Taiwo Awoniyi hmangin goal hnih an khung hmasa a, Saints-in Carlos Alcaraz hmangin siphurh an sut ṭhen.

Forest-in Morgan Gibbs-White penalty hmangin an khung leh a, halftime-ah 3-1 a hman mah se second half ṭantirhah Saints tan Lyanco-a'n a khung. Mualneitu tan Danilo-a'n minute 73-naah a khung a, injury time-ah Saints captain James Ward Prowse-a'n penalty khung leh mah se result a danglam pha lo.

Southampton hi table mawngphahah point 24 hmuin an awm a, chhiarkawp danin an la relegate lo tih chauh a ni tawh. Forest erawh point thum hlu tak avangin 16-naah an awm a, point 33 hmu tawh mah se an dinhmun erawh a him bik lo.