Beisei angin Real leh City inkhel a hmuhnawm: Real Madrid = Manchester City

Thawhlehni zan khan Champions League semifinal first leg-ah Real Madrid leh Manchester City te an inkhel a, inkhel en châkawm bik a nih ang ngeiin football hmuhnawm bik an chhawp chhuak.

Santiago Bernabeu-ah mualneitu Los Blancos-in Vinicius Jr hmangin an khung hmasa a, City-in Kevin de Bryune hmangin second half-ah an sut. Final khel tur hriatthiam a la har a, May 17, Nilaini zan hian Etihad Stadium-ah chinfel a ni ang.

An inrem uluk

Carlo Ancelotti leh Pep Guardiola-a'n semifinal-ah risk lak an tum lo, bul ṭan tura beiseiten bul an ṭan vek. Erling Haaland thlawp turin Kevin De Bruyne, Jack Grealish, Bernardo Silva leh Ilkay Gundogan te an awm.

Real lamah pawh Karim Benzema thlawp turin Rodrygo, Vinicius Jr te an awm bakah midfield-ah tawnhriat nei ṭha pahnih Toni Kroos leh Luka Modric ten bul an ṭan.

Ancelotti-a'n left back-ah Eduardo Camavinga a rawn chhawr a, hei hi thil thar a ni tawh lo. French midfielder hi Copa del Rey final-ah pawh mual sirah dah a lo ni tawh a, a khelh dan hi 'inverted wing back' tia sawi a ni.

Vini Jr Show

Real leh City inkhel tur a nih avangin inkhelh hma hauhin an sawi 'hot' nasa a, Pep-a hote hi chak tura ringtu ṭhahnem zawk mah se Ancelotti enkawl Real hi UCL-a sulhnu nei ṭha ber an nih miau avangin chak tur rin thiam a harsa sa hrim hrim.

City-in ball an chang tam nghal a, De Bruyne-a'n a hnampui Courtois tan hna a siam nghal. Pep-a hoten ball an chang tam a, Real tlarhnung a phui ṭha - English club chance neihna hi 'long shot' a ni zel.

Minute 25-na chhoah Real an hlauhawm ve ṭan chauh a, Vini Jr chu mual vei lamah a hlauhawm. Mualneituin minute 36-naah goal an nei a, Camavinga-a'n Modric nena wall pass hnuah ṭha takin ball a chhuahpui a, Vini Jr a pe a, Brazlian winger hian huai takin box pawn aṭangin kawh zetin a pet goal. Santiago Bernabeu-a mipui thawm a ring hle.

De Bruyne Show

Man City-in second half-ah siphurh sut tumin an nawr a, Alaba leh Rudiger te inkawpin Haaland an dah ṭhat avangin Kevin de Brunye-a mawhphurhna a sang sawt a, Belgian midfielder hian mawphurhna a la ngam bawk.

KDB-a'n second half ṭantirhah Thibaut Cortois tan ṭum hnih hna a siam nghal a, Real midfielder-ten De Bruyne an ven uluk phah lo. Belgian midfielder hian inrintawkna a neih belh zel a, minute 67-naah Gundogan-a ball pek chu KDB hian box pawn aṭangin goal sirah tak a pet lut.

Courtois tan dan ngaihna a awm lo a, goal sawisel bo a ni. Mahse, maw! goal luh hma hian Bernardo Silva ball lak hmain a 'out' hman. VAR-in an en kan a, City an vannei. VAR meuh pawh hi a enkawltu mihring an ni tlat!

Goal lut 1-1 a nih hnuah pawh inkhel a la nung zel. Karim Benzema-a'n Ederson tan hna a siam a, Aurelien Tchouameni ball pet kawh ṭha zet pawh Brazilian keeper hian a dang ṭha hle. Goal dang a luh belh lo a, 1-1 in inkhel a tawp - second leg a hmuhnawm dawn.

Khelh hmabak ngah City

Man City leh Real Madrid inkhel result-a lawm tur chu Arsenal an ni a, Gunners hian Santiago Bernabeu-a inkhel result avangin kartawpah Pep Guardiola hote hi Everton laka point hloh thei dinhmunah an ngai ang.

Cityzens hi Premier League nomawi humhim turin chetsual a thiang lo a, Toffees an hmachhawn hunah Pep-a'n engtin nge squad a siksawi dawn tih hriat a châkawm ta hle.

Spanish manager hian Real lakah player a siksawi ngam lo a, substitution pakhat pawh a siam ngam lo. Pep hian Real nena second leg an khelh tur a dah pawimawh dawn a, rilru khingbai taka awm laiin relegate hlau leh match hnuhnung bera che ṭha Everton an hmachhawn dawn.

Sean Dyche-a hote hian an match hnuhnung berah Premier League-a game ṭha ber zinga mi Brighton & Hove chu 5-1 zetin an sawp a, City meuh tan pawh Goodison Park-a lenluh hi a châkawm dawn lo.

City hian Everton an hmachhawn zawhah Real Madrid nen an inkhel lehnghal dawn a, chumi zawh chuan Chelsea an mikhual dawn. Blues hian Frank Lampard hnuaiah chak hmel an hmu tawh a, an squad a chhah ṭha bawk.

Chelsea zawhah City hian Brighton leh Brentford te an la hmachhawn dawn a, Seagulls leh Bees te hi top 10 china awm an ni a, chetsual theihna team an ni. Premier League zawhah FA Cup final khelh tur a la awm a, Pep-a hote hi treble champion thei ni siin nomawi chawi lo thei an ni bawk.