Zaninah Europa League Semifinal; Roma vs Leverkusen; Juve vs Sevilla

European football inelna sang pahnihna Europa League semifinal first leg chu zanin dar 12:30 hian khelh a ni dawn. Jose Mourinho enkawl AS Roma chuan Bayer Leverkusen an mikhual dawn - Bundesliga team hi Xabi Alonso enkawl an ni thung.

Champions League aṭanga tla, Serie A champion ni phak lo bawk - mahse Europa League lama che ṭha Juventus chuan Sevilla an mikhual dawn bawk. Spanish team hi Manchester United pet chhuaktu kha an ni a, inkhel a hmuhnawm dawn.

Mourinho naute

Mak ve deuh mai chu Jose Mourinho hi a kalna lamah chuan a hlawhtling deuh zel - Tottenham Hotspur kha nomawi a chawi lohna awmchhun ni mah se Spurs hian League Cup final thlen hmain an ban. Portuguese manager hi a vanglai a pel deuh tawh niin a lang hman a, mahse a la ṭha tawk tih hretu chu AS Roma hi an ni.

Italian club hlun Roma hian tun hmain European fooball huang chhungah hlawhtlinna an la chang ngai lo. Mourinho an neih chinah erawh thawnthu a danglam, season hmasa khan Europa Conference League-ah an champion.

Conference League final-ah hian Feyenoord an hneh, kumin Europa League semifinal thleng turin Dutch club bawk hi an hneh. Hetiang thawnthu deuh hi tun hmain Poto a enkawl lai khan a lo nei tawh bawk a ni.

UEFA Cup-ah Porto a champion pui a, a hnu season lehah Portuguese club hi Champions League nomawi a chawipui. Inelna hniam zawk aṭangin a sangah a champion pui tihna a ni, kuminah pawh nikuma tournament an khelh aia sangah champion zui leh theihna remchang a nei.

Roma coach Mourinho chuan, "Ka hnathawhah hian tawnhriat ka ngah tawk, tunah hian team inkhairual tak kan nei niah ka ngai. Tunah hian player leh fans tan hun pawimawh tak kan tawng chho mek a, fans lawmna siam ngei kan tum dawn.

"Ka naute hian thiam leh theih chin an nei, kan inpawhna pawhin chin tawk a nei. Chutihrualin Roma hi team kan ni satliah lo a, chhungkua kan ni tel bawk," a ti. Mourinho hi Paris Saint Germain nen sawizawm a ni fo a, mahse tun hnaiah Roma khawpui nuam a tih thu a sawi.

Zirlai naupang kha

Jose Mourinho-a'n Real Madrid a enkawl lai khan Xabi Alonso hi a midfielder pawimawh zinga mi a ni a, Spain international hi ball sem thiam a nih bakah a thluak a fim - inkhelh a chawlhsan hnu pawhin team enkawl lamah bul a ṭan fuh viau.

Bundesliga mawng lama talbuai Bayer Leverkusen chu hun rei lote chhungin Alonso hian a siamṭha. Tunah chuan German football inelna sang berah hian parukna a nih pui mek a, season thar atan pawh European football an beisei phak mek.

Tun hnaiah Leverkusen hi inelna hrang hrangah match 14 chhung tlawm loin an kaltluang thei, mahse kartawp inkhelah an record ṭha tak hi Cologne lakah a tawp. Italian club khawng ṭha tak lakah an tho leh nghal thei ang em, tih chu fiah a ni dawn.

Leverkusen coach Alonso chuan, "Europa League semifinal luh chu a sang ṭha viau, chumi atan chuan inbuatsaihna pawh kan nei ṭha hle. Hnehna kan chan theihna tur a nih chuan kan hmaa tih tur awm apiang kan ti ang," a ti.

German club Leverkusen hian European football bikah semifinal an thlen vawi lina a ni a, an thlen san ber chu 2001-2002 kha niin Champions League semifinal-ah a chak lo zawk an ni, kuminah hian Europa League final lut tur chuan hna a awlsam dawn lo hle.

Paulo Dybal, Stephan El Shaarawy, Tammy Abraham leh Georginio Wijnaldum te awmna team dangchat tur chuan Alonso-a'n ngaituahna a hman nasat a ngai dawn a, chutihrualin Bundesliga an khelh dan thlir chuan Roma luhchhuah turin theihna an nei.

Goal khung tum Juventus

Player ṭha leh hming langsar tak tak an nei chungin Juventus hian goal khung an harsat tlang a, tun hnaia an khelh dan thlir erawh chuan he an harsatna hi an sukiang chho dawn niin a lang. Coach Massimiliano Allegri chuan Sevilla lakah goal khung ngei an tum tih a sawi.

Old Lady hian kartawp Serie A inkhelah khan Atalanta 2-0 in an hneh. Samuel Iling-Junior leh Dusan Vlahovic ten goal an khung a, team ṭha laka goal hnih an khung bakah anmahni goal an venghim thei hi Europa League semifinal inbuatsaihna ṭha tak a ni ngei ang.

Juve coach Allegri chuan, "Ka player neih dan chhut hian midfielder pathum hman hian kan goal nawr a na zawk. Europa League bik thlir pawhin, match hmasa lama Sporting Lisbon kan hneh ṭum pawh khan thutlukna kan siam fuh.

"Kan hmatawngte hi hla tak aṭanga goal khung chi an ni lo a, box chhung aṭanga khung thiam an ni. Chuvangin dawhthei taka kan khelh a ngai tihna a ni a, kan match khelh turah pawh hian ball chang tam chunga nawr kan tum ang," a ti.

Serie A point 15 an paihsak pek kir an nih avangin Juve hi table-ah pahnihna an ni mek a, season thara Champions League khel turin an dinhmun a ṭha. An tan UCL ticket neih ringawt ai chuan Europa League nomawi an chawi thei a nih chuan season kharna duhawm a ni zawk ang.

Juve hmachhawn tur Sevilla hi dah hniam a rem lo. La Liga season chu an hmang ṭha lo ngei mai, table laihawl luahtu an ni. Mahse, Europa League a nih tawh chuan an boruak hi a danglam tlat zel - zaninah pawh Juve hi an hlau dawn lo.

Sevilla coach Jose Luis Mendilibar chuan, "Manchester United nen kan inkhelh tur nen khan a boruak a inang viau mai. Team lian leh huhang ngah an ni a, an thawm pawh a na takzet. Mahse, Sevilla hian Europa League-ah sulhnu kan nei ṭha ve tawk," a ti.

April thla atana La Liga player of the month chawimawina dawng thei Youssef En-Nesyri an nei a, Moroccan striker hi innghahna tlak a ni. Defender ṭha Tanguy Nianzou a dam tawh bawk a, a inlan thei a nih phei chuan tlarhnung lam an nghet zual sauh bawk ang.