Khawi lam kawng nge i zawh dawn... Messi?

Khawvela footballer ropui ber ang hiala tam takin an ngaih Lionel Messi-a'n Paris Saint-Germain-ah contract thar a ziak dawn lo tih a chiang tawh a, thil chiang lo pakhat erawh a awm - khawi club-ah nge a khelh dawn, tih hi a ni.

Messi hi a khelhna hlui Barcelona chuan laklet an duh nia sawi thawm a awm reng a, mahse, sum lam harsatna avanga Messi meuh chhuahtirtu club hian Messi an lalet thei ang em, tih chu zawhna a ni mek.

David Beckham-a club Inter Miami hming lam rik a ni a, MLS lam chuan Barcelona legend hi US leilunga football khelhtir ngei an châk hle nia sawi a awm - eng tak ang maw?

Hetiang boruak kara thawm lian tak chu Messi-a'n Saudi Arabia lam a pan tur anga sawi hi a ni a, Argentine forward hian a career tawp lam hi sum tamna lama hman a pawi ti lo nia sawi a awm.

Mahse...

Messi thawm ri nek nek karah lo lang vat ṭhin pakhat a awm a, chu chu a pa Jorge Messi a ni. Jorge chuan a fapa hian thutlukna engmah a la siam loh thu a sawi a, Ligue 1 khelh zawh hunah a hma hun a tichiang dawn chauh niin a sawi.

Tun hnaia Saudi lama chawlh hmanga zin Messi hi Al-Hilal chuan kum khata euro maktaduai 400 hlawhtir an inhuam nia sawi a ni a, Messi hian season tharah Saudi club hi a zawm dawn niin khawthlang media-te chuan an tarlang.

Mahse, Messi pa Jorge chuan, "Eng thutlukna mah siam a la ni lo a, Leo-a'n PSG tan league a khelh zawh hma chu eng thutlukna mah siam a ni rih dawn lo. Season zo phawt se, chutah chuan a hma hun atan thutlukna kan siam ang," a ti.

Jorge chuan sawi zawmin, "Mi tam takin Lionel hming hi hriat hlawh nan an hmang ṭhin a, mahse, thudik chu pakhat chauh a awm. Chu chu eng club zawm tur mahin thutlukna a la siam lo, tih hi a ni. ṭawngkain emaw, ziakin emaw, engmah inremna a la awm lo," a ti a, season tawp an nghah thu a sawi.

Barca hmalakna

Kum 35 mi ni tawh mah se Messi a la thiam reng a, a vanglai ang tak takin goal a khung pup pup tawh lo a ni mai thei - mahse, team tan a la ṭangkai reng a, a khel a hmuhnawm a, midang neih ve lo danglamna a la nei reng. Hei vang a ni mahna, duhtu a la ngah hle.

Barcelona president Joan Laporta chuan Messi laklet hi thupui berah a nei mek, nia sawi a ni a, Argentine forward ngei pawhin duh thlang thei ta se, Nou Camp-a a hmangaihte nena intawn leh hi a duh ber ang.

Mahse, Catalan club hian tun dinhmunah pawh season khata player hlawh atana sen theih zat aia tam an seng mek nia sawi a ni a, La Liga dan angin, league thuneitu lamah heti zat sum hmang chunga an kal zel theih dan tur ruahmanna an siam a ngai a, chu chu thehluh tur a ni.

Barca hian kar hmasa lawk khan an ruahmannate hi La Liga hnenah an theh lut tawh a, Spanish champion ni mai tur club hian La Liga president Javier Tebas hnenah pawh Messi lakluh an tum thu hi an hrilh thlap tawh.

Di hlui

Barca sum leh pai dinhmun thlir chuan, Messi kir leh tur anga sawi hi hmangaih thawnthu satliah a nih theihna chance a sang viau - chutihrual chuan a phek lehlam keuin, Catalan club ṭantute tan chuan beisei a neih loh theih loh ve lawi bawk si a ni!

Spanish media ṭhenkhat chuan Messi hian Barca a kir theihna tur a nih phawt chuan a hlawh hi nasa taka tihhniam a pawiti lo niin an sawi a, sum a ngah tawk tawh avangin World Cup-a Argentina champion puitu hian sum aiin lunglenna lam a hawi a ni mai thei.

Messi hian Barca-ah hian season khata €25mtd hlawh a pawi ti lo niin an sawi a, heti zat anga Barca hi a pan a nih ngat chuan a hlawh hi €15mtd velin a hniam dawn tihna a ni.

Barcelona tana beiseina siamsaktu pakhat a awm - Messi hian Copa America 2024 khelh a la tum a, hei vang hian European football-a khelh chhunzawm zel a duh nia sawi a awm a, Europe-ah a cham chhunzawm a nih pawhin a mak lo ang.

Saudi beiseina

Euro maktaduai 400 hi European top flight league-a club tam zawk lei theihna khawpa sum tam a ni. Heti zat sum hi Al-Hilal chuan Messi hlawhtir an inhuam a, a pan a nih ngat chuan footballer hlawh hnem ber a ni ang.

Al-Hilal beiseina siamsaktu pakhat a awm - Messi hian Europe-a khelh chhunzawm duh mah se, ani ang meuh player lakluh châk duh tur khawp club hi European football-ah an tam tawk lo.

Amah duhtu langsar Barca sum dinhmun hi khawvelin a hre kar a, club dang tan a hlawh zat piahlamah thuneihna a ken tel tur hi lo mikhual tel a châkawm lo - hei tak hi Messi hma hun tichiang lotu a ni.

Al-Hilal hian Messi thlem luh theihna tur a nih chuan a ṭhian kawmte thlenga seng tel an pawi ti lo a, tun dinhmunah Barca player Sergio Busquets leh Jordi Alba hming pawh an lam ri.

MLS lam hi

David Beckham-a club Inter Miami-in Messi lakluh an tumna a rei tawh a, US-a inkhelhtir ngei an duh. Inter Miami neitute zinga mi Jorge leh Jose Mas te unau chuan vawi tam Messi pa Jorge an dawr tawh.

Messi hian Miami-ah in a neih avangin chawlh pawh a hmang fo ṭhin a, US-ah a mikhual lo. MLS commissioner Don Garber meuh pawhin an club beiseina chu ṭawmpuiin, Messi chu MLS-ah khel se a duh.

Mahse, Garber hian Messi meuh thlem thlu tur chuan thil danglam bik tih ngaia a hriat thu a sawi. Kum 2007-a Beckham-a'n Los Angeles Galaxy a zawm khan $25mtd-a MLS club lei theihna dan a ziak tel.

Garber chuan hetiang deuh hian, hlawh ringawt piah lamah hnemhnanpui tham thil dang zawrh a duh a, Messi hian MLS lam a pan ta thut a nih pawhin a mak chuang lo ang - tunah erawh, "Khawi lam kawng nge i zawh dawn, Messi?" tih bak zawh theih a awm rih lo.