76ers tan match khat chak a la ngai

Joel Embiid chuan a match hnuhnung pathumah point 30 a nei tling vek a, a team Philadelphia 76ers chu NBA Eastern Conference semifinal lut turin dinhmun ṭha takin a dinpui - Sixers hian nimin zing khan Boston Celtics chu 115-103 in an hneh.

Eastern Conference champion lai Boston lakah 76ers hian best of seven series khelh turah 3-2 in hma an hruai mek. May 12, Zirtawpni zing dar 5:00-ah game 6 an khel leh dawn; Sixers hi an chak leh a nih chuan conference final an lut ang.

TD Garden-a inkhelah Embiid hian point 33 a neih bakah rebound vawi sarih a la bawk a, hnehna an chan theih nan hian ani bakah point 30 neitu Tyrese Maxey a langsar hle bawk.

Season duhawm hmangtu Embiid chuan, "Inkhel a la zo lo, a hmawr kan bawk fel phawt a ngai. Game 5 hi a lan dan mai aiin a awlsam lo, tun ṭumah hian vannei taka chak mai chauh kan nih avangin kan hmabak a la hautak dawn," a ti.

Philadelphia tan hian tun hmain playoff chinah Allen Iverson (2001) chuan a zawnin point 30 chuang vawi nga a nei tawh a, Wilt Chamberlain (1965) pawhin ṭum thum a nei tawh - legend pahnih te kiangah Embiid (vawi 3) a ding chho vek mek.

Western Conference semifinal lamah Denver Nuggets chuan Phoenix Suns 118-102 in an hneh a, anni pahnih hian series-ah 3-2 in hma an hruai. Zirtawpni zing dar 7:30-ah an intawng nawn leh dawn. Suns tan tlawm nawn a thiang tawh lo.

Nikola Jokic-a'n Nuggets tan triple-double a nei, point 29 a neih bakah reound vawi 13 lain assist ṭum 12 a nei pawh. Bruce Brown pawhin point 25 a nei bawk a, match khat an chak leh thei a nih chuan conference final an lut chiang ang.