David Moyes-a tan hmingchherna hun

LMA manager of the year-ah ringawt pawh ṭum thum ngawt thlan a ni tawh a, mahse, heti chung hian Scottish coach langsar David Moyes-a'n nomawi liantham chawi a la nei lo.

Moyes hian Manchester United a enkawl lai khan FA Community Shield chu a la ve ngei a, mahse, nomawi lianthama chhiar tel a ni lo - Everton a enkawl laiin 2008-09 season khan FA Cup final an lut a, mahse, an chak lo.

Kum tam liam hnuah David Moyes-a'n hun ṭha a nei leh ta a, nomawi chawi turin match thum a la hmabak - zanin dar 12:30 hian Europa Conference League semifinal first leg-ah AZ Alkmaar an mikhual dawn.

Tun season Premier League-a beisei phak lo Moyes tan tun hi hun ṭha a ni a, league lama mangchhia nghilha European football-a hming chher an tum ang - tun hi hun ṭha chu a ni e.

A hunah tak

Premier League match thum a zawna an chak loh hnuah West Ham an chak a, an hneh lah team satliah ni loin Manchester United an ni - kartawp league inkhelah an mikhual hi 1-0 in an hneh a, relegation zone an hlat sawt.

Hammers-in an khelh ṭhat ni chuan European football-a team ṭha pawl hneh tur pawhin an ṭha tawk tih an inhria a, an boruak ṭhat vanglai taka AZ an mikhual tur hi fans tam zawk duhthusam a ni ang.

Nipui transfer-a pound maktaduai 120 vela chhuak tur anga sawi Declan Rice hi Hammers tan innghahna tur a ni leh dawn a, kum 25 mi attacking midfielder Lucas Paquetá pawh hi AZ lam tan theihnghilh palh chi a ni dawn lo.

Kum 26 mi Jarrod Bowen-a'n tun season-ah beisei phak lo deuh mah se, goal 11 a khung tawh avangin ngaihthah a thiang lo a, goal 10 khung tawh Saïd Benrahma pawh hi ven bik ngai tur a ni.

AZ hi

Premier League-ah kan hmuh fo avangin Hammers lam kan hrechiang a ni mai thei a, AZ erawh kan hrechiang lo mai thei - Dutch team ṭha hi zuam sual theih tak tur an ni.

AZ hian semifinal lut tur hian round of 16-ah Italian club ṭha Lazio chu inkhel pahnih belhkhawmah 4-2 in an hneh thei a, quarterfinal-ah Anderlecht an paltlang leh bawk.

Tlarhmaa Greece international Vangelis Pavlidis hian tun season-ah goal 22 a khung tawh a, kum 19 mi winger Myron van Brederode pawh hi lo en bik a sual lo ang - theihna a nei sang tlat.

Number 10 Dani de Wit sawi hmaih a harsa - tun season-ah match 28 a khelh aṭangin goal 13 a khung a, assist vawi hnih a nei bawk. Hammers tan hnawksak tura ngaih a ni.

Fiorentina beiseina

Kum 2001 hnua a vawi khat nan Fiorentina-in champion theihna remchang an nei a, mahse, final lut tura FC Basel an paltlang phawt a ngai - team pahnih hi zanin dar 12:30 vek hian semifinal lehlamah an intawng dawn.

Italian club langsar ṭhin Fiorentina hian tlarhmaah Luka Jovic an nei a, Real Madrid aṭanga an lakluh striker hian tun season-ah goal 11 khungin assist vawi nga a nei tawh.

Argentina international Nicolás González pawh hi ngaihthah a thiang lo ang tih a chiang a, ani hian tun season-ah goal 10 khungin assist vawi li a nei tawh bawk.

Tun season-a league lama beisei phak lo FC Basel tan tun hi fan-te laka an hmai bal phih faina remchang a ni a, chumi tur chuan tun season-a goal 16 khung tawh Andi Zeqiri leh goal 16 leh assist vawi li nei tawh Zeki Amdouni te chet ṭhat a ṭul ang.