Marquez intlansiak thei tawh dawn

Tun kar tawpa tlan tur MotoGP French Grand Prix-ah Marc Marquez a intlansiak thei tawh dawn. Spanish rider hi inelna hmachhawn tur a dam chiang tawh tih a team Repsol Honda chuan an tarlang a ni.

Tun season intlansiak hmasa ber Portugal rama an tlan ṭum khan Marquez hi a inhliam a, a ban ding lam zai a ni. A hliam vang hian Argentina, Texas leh Spain rama inelna an neih ṭumin a inlan ve thei lo.

Honda sawi dan chuan an rider hi endikna chi thum hmangin endik a ni a, a ruh hliam hi a dam fel tawh. MotoGP vawi ruk champion tawh Marquez chuan a dam thu sawiin, "Repsol Honda Team tana ka lo kir leh thei tur hi ka lawm.

"Rider ni chunga intlansiak theih loh chu a hrehawm a, a bik takin hliam nei chunga chawlh phei chu a hrehawm zual. Tunah chuan inelna hmachawn turin ka inpeih a, thildang ngaihtuah loin inbuatsaihna pawh ka nei thei," a ti.