Second round-ah Thiem a lut

Dominic Thiem chuan amah ang bawka Austrian tlangval Matthias Ujvary chu 6-4, 6-2 in a hneh a, hnehna chang tur hian darkar khat leh minute 17 hun a hmang - an rama inelna neih mek ATP Challenger 100 event-ah second round a inhlangkai.

Thiem hi seeded pakhatna pek a ni a, a match lehpekah chuan Federico Delbonis nen an intum ang. Kum 29 mi Thiem hian US Open 2020 hnuah nomawi a la chawi leh miah lo, tun ṭumah hian champion leh ngei a tum.

A vanglai chuan Thiem hi world number 3 a ni phak hial, mahse Grand Slam nomawi a chawi hnuah banrek hliam vangin a buai. Season hnih deuh thaw a inkhel mumal lo a, a lo kir leh hnuah pawh ngai a la awh leh thei lo.

Nikum June thla phei kha chuan world ranking-ah Thiem hi 352-na a ni hial, tunah chuan 93-na a ni leh tawh. Clay court hi a inkhelh thiamna hmun a nih avangin atan chuan tun inelna hi French Open inbuatsaihna ṭha a ni nghal ang.