Barca chhuahsan tur Busquets

Barcelona captain Sergio Busquets chuan tun season tawp rualin Catalan club a chhuahsan tur thu a ti chiang. Season 18 tehmeuh a lo awm tawhna Nou Camp aṭangin puanthuah a khai chhuak dawn a, a pan lam tur tak erawh sawi chian a la ni lo.

Spain midfielder hi kum 34 mi a ni tawh - Barcelona tan hian match 718 a khel a, an club tana nomawi chawi tam pathumna a ni phak. La Liga (8), Copa del Rey (7), Spanish Super Cup (7) leh Champions League (3) te a lakpui tawh a ni.

Busquets chuan, "Thutlukna siam harsa tak ni mah se, tun hi a hun chu a ni ta mai si. Barcelona jersey hak leh Nou Camp-ah inkhelh hi ka duhthusam leh suangtuahna a ni ṭhin, ka ti hlawhtling thei hi ka lawm hle.

"Ka tan chuan zinkawng ngaihnawm leh hriatreng tawh tur a ni a, chutihrualin thil engkim mai hial bul ṭanna leh tawp hun a nei a ni tih kan hriat a ngai. He hmuna ka awm laia min thlawptu zawng zawng chungah lawmthu ka sawi," a ti.

Kum 2005 khan Busquets hian Barcelona B team aṭangin senior team tan a khel ṭan, khatih laia coach Pep Guardiola chuan Racing Santander lakah a match hmasa ber khelhna hun a siamsak.

A hun hmasa lama a khelh pui Xavi chu tunah amah enkawltu Barcelona coach a ni tawh a, tun season atan La Liga nomawi an chawi ngei dawn niin a lang - match khelh hmabak panga la awmah point 13 zetin an sang fal mek a ni.