Milan aia chungnung zawk Inter

Champions League final khel turin Inter Milan dinhmun a ṭha ta hle. Simone Inzaghi naute hian AC Milan 2-0 in an hneh a, an ke dinglamin UCL final a rap phak tawh, ke khinghnihin rah ngei an tum ang.

Nilaini zan Champions League semifinal first leg inkhelah Inter tan Edin Dzeko leh Henrikh Mkhitaryan ten an khung - Milan lamin a chhanletna an nei lo. May 16, Thawhlehni zanlaiah second leg an khel leh dawn a ni.

Inter an ṭha zawk

Italian club pahnih hian khelmual an inṭawm a, first leg-ah hian Milan chu mualneitu niin ticket an nei tam zawk. San Siro-ah mipui 80,000 chuang an pungkhawm a, a tam zawk chu Milan ṭantute ni mah se Inter fans an bengchheng zawk.

Minute riatna lekah Dzeko chuan corner aṭanga ball kal chu boruaka a kan laiin a pet lut, amah vengtu Davide Calabria aiin Serbian striker Dzeko-a'n tharum a ngah zawk avangin a duh anga ball pet turin hmun a insiam thei.

Milan an insiamrem hman lo, goal luh aṭanga minute thum hnu lekah Henrikh Mkhitaryan chuan Federico Dimarco siamsak hmangin an goal hnihna a khung zui, goalkeeper Mike Maignan tan tih theih a awm lo.

Goal hnih chhuahtu Milan an buai a, midfielder Hakan Calhanoglu khung belh tur chu goal banin a lo dang hlauh a, keeper Maignan-a'n hna hautak a thawk zui bawk, goal hnih chauh an chhuah avangin lawm tur an ni.

Hun tawp dawn lamah Milan an kang ve hret a, mahse goal an sual chhuak thei lo. Sandro Tonali-a'n goal ban a pet per ve bak chu sawi zui tur an ngah lo, second leg-ah chuan Stefano Pioli-a nauten goal khung ngei tuma an beih a ngai dawn.

Milan beiseina

Season hmasa khan Milan hian Stefano Pioli kaihhruaina hnuaiah Serie A nomawi an chawi a, hei hi an beisei aia sang a ni. Italian manager kaihhruaina hnuaiah hian an beisei aia sang bawk an thleng mek - season tir khan UCL semifinal an thlen ring hi an tam lo ang.

Champions League bikah chuan Inter lakah Milan hi tun hma chuan an la tawm ngai lo, mahse tunah chuan thawnthu a danglam ta. An player ṭha bera chhal ngam Rafael Leao chu hliam vangin an chhawr thei lo; Portuguese forward tel lo chuan an goal nawr a na tawk lo.

Second leg an khelh hunah chuan Leao hi dam tawh tura beisei a ni a, an boruak a danglam tawh ang. Chutihrualin a tlem berah penalty shootout thleng tur pawhin goal hnih tal an khung a ngai dawn, hna a hautak tawh dawn hle - tih theih loh erawh a ni lo.

Milan manager Pioli chuan, "Zep tur a awm lo, tun ṭumah chuan Inter kha team ṭha zawk an ni. Rilru leh taksa lam thleng pawhin kan ngam lo, kan chak loh hi pawi kan ti hle. Mahse, second leg-ah chuan result hi tih danglam kan tum ang," a ti.

Defender Fikayo Tomori pawhin a tir lama an tlarhnung pherh an tuar tih a sawi a, a dinhmun chhe zawk ni tawh mah se Champions League final thlen theih an la beisei thu a sawi ve bawk. European football-ah hian khualmual leh mahni muala goal khung hlut zawng a inang tawh.

Ṭawng fimkhur

Inter Milan manager Simone Inzaghi chuan an tan hnathawh tur a la tam tih a sawi. Inter hian goal hnih an khung a ni ringawt lo a, captain armband hrengtu Lautaro Martinez-a'n penalty hlawh chhuak nia a inngaih chu VAR hmanga hnawlsak an ni.

Goal dang khung theihna remchang pawh an insiam hnem. Mahse, Inzaghi chuan, "First half kan khelh dan kha chu duhthusam a ni, mahse a tawpah erawh goal kan chhuah loh avangin kan vannei hle niah ka ngai bawk.

"A pawimawh ber chu final kan lut em tih a ni, chumi thleng tur chuan hmabak kan la nei - tunah hian kawng chanve chauh kan la zo. Second leg-ah erawh chuan khelmual chhungah min ṭantu tam zawk an awm dawn," tiin a phur hle.

Inter hian season an hman ṭhat tawk loh avangin an coach Inzaghi hi ban mai theih dinhmunah a ding hman, mahse tunah chuan club thuenitu lamin an ngaihdan an thlakthleng rihin a rinawm - Milan an hneh theih chhan pawh coach thutlukna fuh vang a ni.

Man tam leh hlawh hnem Romelu Lukaku aiin Dzeko a ringtawk zawk a, striker hnunga zalenna nei turin Martinez a dah bawk. Inkhel boruak sangah player tawnhriat nei ṭha ho a ring zawk chu a fuh hle - chesual loa tlang ngei an tum ang.