Kick ID-in Mizo naupang zirchiang

German khawpui pakhat Berlin a inkhuar, tunlai thiamna hmanga inkhel mite thiam dan, khelmual chhunga an chet dan chitin uluk taka lo thlithlaitu KICK ID chuan nimin khan Mizo naupang football khel mite an rawn zir chiang.

MFA Ground, Sairang Dintharah Kick ID mi leh sa te hian All India Football Federation aiawhte nen MFA Under 15 League a player 50 te an rawn belchiang a. Hei hi Kick ID Pilot Project niin India ram hmun liah (4) an kalpui dawn a ni.

Kick ID hian football player-te chu field chanveah panga leh panga (5v5) a inkhelh tirin, an che zia chitin ennawn leh theih turin Pixellot hmangin uluk takin an record a ni.

Kick ID hotupa Hisham Telib chuan, "India ramah naupang football thiam tak tak an awm tih kan hmuhin kan phur a, hmun thuma analysis kan tihtawhnaah thiam tak tak kan hmu tawh a ni," tiin a sawi.

Hisham Telib chuan an analytics/tracking system aṭanga thiam bik an hmuhte chu kawng zawnsak zel an inhuam thu a sawi bawk a ni.