PSG lam hawi lo Mourinho

Jose Mourinho chuan Paris Saint Germain nen an inbiak loh thu a sawi a, a club enkawl lai AS Roma bak chu team dang a ngaithuah tel loh thu a sawi chhuak bawk.

Mourinho hian season hmasa khan Roma hi Europa Conference League nomawi a chawipui, kuminah Europa League semifinal an thleng leh tawh, champion turin kawng a thui tawh lo.

Italian club tan hna a thawk ṭha a, ram hrang hrangah Mourinho hian sulhnu a nei ṭha bawk. Tun hnai khan Champions League champion duh PSG nen sawizawm a ni a, mahse an la inbe rih lo tih a sawi chiang.

Mourinho chuan, "Kan la inbe ngai lo, min rawn bia a nih pawhin an duh ang chhanna an hmu thei rih lo ang. A chhan chu Rome khawpuiah hian ka hlim a, he hmunah hian hmachhawp ṭha tak ka la nei," a ti.

Portuguese manager hian Porto, Chelsea, Inter Milan leh Real Madrid te hlawhtling takin a enkawl tawh. Tottenham pawh League Cup final a luh pui a, mahse final khelh hmain an ban - Roma tan pawh nomawi a chawi leh tawh.