Real Madrid - Dah hniam an thiang lo!

La Liga bik thlir chuan Real Madrid tan season ṭha a ni lo a, Supercopa de Espana-ah an hmelma Barcelona chu final-ah 3-1 in an hneh lo. Mahse, Carlo Ancelotti hote hian Copa del Rey-ah an champion a, UEFA Super Cup bakah FIFA Club World Cup nomawi an chawi bawk.

A tawi zawng chuan Los Blancos-in nomawi pathum an chawi tawh a, season ṭha tak an hmang a ni ringawt lo. Champions League semifinal-ah pawh Real hian Manchester City hi hneh se, thilmak a ni lo - Europe inelnaa record nei ṭha ber club an ni tlat.

Real Madrid player-te hi thlir ila, an squad chhahzia a lang chiang lehzual.

Goalkeeper: Courtois

Kum 31 mi Thibaut Courtois hi a khelh ṭhat ṭum chuan khawvela keeper ṭha bera chhal theih a ni a; Premier League Golden Glove, FIFA World Cup Golden Glove bakah The Best FIFA Goalkeeper thlengin thlan a ni tawh.

Kum 31 mi Courtois hian a club khelhna Genk, Atletico Madrid, Chelsea leh Real Madrid te an ram league-ah a champion pui vek. Belgian keeper hi tun season-ah vawi 43 a inlan tawh a, second keeper Andriy Lunin pawh Ukraine international niin vawi 12 a inlan ve tawh bawk.

Tlarhnung an ṭha

Knockout football-a che ṭha tur chuan tlarhnung neih ṭhat a ngai a, Real Madrid hian tlarhnung an nei ṭha. Antonio Rudiger hi Germany inngahna a ni a, Real a zawm hmain Champions League leh Europa League-ah Chelsea a champion pui.

City laka first leg-a Rudiger-a kawppui David Alaba hian Real zawm hmain Bayern Munich tan nomawi chawi theih zawng zawng a chawi tawh a, Los Blancos tan pawh nomawi chawi theih zawng zawng a chawi.

Pakhat zawk pawh hi inhliam se, kum 25 mi Eder Militao a la awm. Militao hi Brazil-ah Thiago Silva leh Marquinhos te awm chungin World Cup match pawimawh-ah bul a ṭan thei a ni.

Mual dinglama awm Dani Carvajal hi kum 31 mi a ni tawh a, Real academy chhuak a nih avangin nomawi a chawi hnem tawh hle. A la ṭhatzia chu nikum UCL final-ah khan a chiang.

Mual vei lamah Eduardo Camavinga chu inverted wing back angin an chhawr a, khawvel midfielder theihna sanga tia sawi ṭhin Camavinga hian a hna hi a tlin. Tun season-ah pawh Real tan match 53 a khel tawh a, position chi hniha a khelh theih bawk avangin player inlan hnem ber a ni.

Real hian left wing back pangngai Ferland Mendy an nei a, Le Havre academy chhuak hi Lyon aṭangin khawvelin an hre ṭan. Mendy hi bench-a dah atan chuan uiawm tham a ni a, Real hian bench-ah Spain international Nacho an la dah thei bawk.

Ṭha bik awm khawmna

Real Madrid midfield ṭhatzia tilang chiangtu chu Casemiro a ni a, Los Blancos hian Brazilian midfielder hi Manchester United-ah an kaltir a, English club ṭantuten hahipin an fak.

Real-in Casemiro an chhuahtir phal chhan chu player ṭha dang an la ngah vang a ni a, midfield-ah hian legend tia sawi theih Luka Modric leh Toni Kroos te an la kawl. Modric hi Ballon d'Or dawng thei khawpa thiam a ni a, Kroos hian a phu tawka fakna a dawng lo. German midfielder Kroos hian Real pan hmain Bayern chu nomawi chawi theih zawng zawng a chawi pui a, a khelhna apianga 'game tempo' siamtu a ni.

Veteran midfielder pahnih thlawp tur hian Federico Valverde an kawl a, hming langsar ber ni lo mah se team tana ṭangkai a ni. Uruguayan midfielder Valverde hi Ancelotti pawhin a dah sang a, tun season-ah goal 10 a khung tlin loh chuan coach hna chawlhsan a ngam hial. Valverde hian goal 12 a khung tawh a, a goal khung zat aiin lang lo lama team tana thawhrimna hi club-in an ṭhatpui.

Real-in euro maktaduai 80-in nikum June thla khan Monaco aṭangin Aurelien Tchouameni an lalut. Kum 23 mi Tchouameni hi a ṭha tih lanna chu nikuma FIFA World Cup final-ah khan bul ṭantu a ni a, France team innghahna a ni pha.

Mamawh dan a zirin Camavinga pawh midfield-ah a chhawr theih a, Arsenal-a loan hmanga khel tawh Dani Ceballos pawh a la awm.

Benzema leh Vini Jr

Real Madrid-in Karim Benzema an kawl a, Cristiano Ronaldo-a'n hun rei tak a hliah khuh hnuin French forward hi a rawn par vul. Kum 35 mi Benzema hi season hmasa lama a chet ṭhat em avangin nikum khan Ballon d'Or a dawng pha hial a, tun season-ah pawh team inngahna a ni.

Chutihrualin tun season bikah chuan an goal bawhna ber chu Vinícius Júnior a ni a, Brazilian forward hi a tlan chak satliah lo a, ball a thiam tel avangin defender-ten ven ngaihna tak an hre lo a ni ber.

Vini Jr a vul em avanga langsar tawk lo Rodrygo pawh hi sawi hmaih a thiang lo. Santos aṭanga Real zawmtu Rodrygo hi a tlan chak a, ball a thiam bakah goal pawimawh a khung thei bawk.

Kum 22 mi Rodrygo hian UCL semifinal an luh theih nan Chelsea lakah goal hnih a khung a, Copa del Rey final-ah pawh Osasuna lakah goal hnih a khung. Goal pawimawh khung dang pawh a la ngah a, Man City pawhin second leg-ah an ven uluk a ṭul ang.

Real hian Spain inter-national Marco Asensio leh Lucas Vázquez bakah a hun laia ṭha ber zinga mi Eden Hazard te an la nei bawk. Hazard erawh Chelsea-a player ṭha bik kha ni tawh loin Real-ah chuan squad tikimtu a ni ta zawk.