I hriat ngai loh Japanese tlangval, Scottish football ngamtu chu!

Hmanah chuan Japan, South Korea leh Iran te nen tual khatah India an leng za ṭhin a, Asian football powerhouse tiin an hming lam rik a ni ṭhin. Tunah erawh thawnthu a danglam ta.

Japan, South Korea leh Iran ten Asian football-ah hming an chher chhunzawm laiin India erawh a reh vang vang a, engtikah tak par chhuak leh ang maw, tiin football fan-ten zawhna an inpe mek.

Tun hnaia Asian player zingah a bik takin Japanese leh South Korean player ten European football an run mek a, chung zinga hming langsar tak pakhat chu Kyogo Furuhashi a ni.

Japanese striker hian Scottish club ropui Celtic tan a khel mek a, Henrik Larsson hnua Celtic striker ropui ber a ni em, tih chu zawhna awm mek a ni - hei hian Scottish football-a a hnathawh ropuizia a hrilhfiah.

Scottish champion

Celtic hian kar hmasa Pathianni khan Hearts chu khualmualah 2-0 in an hneh a, goal khungtu hi Japanese striker Furuhashi leh South Korean striker Hyeongyu Oh te an ni a, an team chu champion nomawi an chawipui.

Scottish club hian league match li khelh tur la nei mah se an hnuai chiaha awm Rangers tan um phak theih an ni tawh lo a, champion lawmna hlado chham chungin ro an rel.

Celtic hian Scottish Cup final an la hmabak a, June 3 zanah Inverness CT nen champion an inchuh dawn - Scottish League Cup-ah an champion tawh avangin an chak leh a nih chuan, tualchhung inelna lian pathumah an champion dawn tihna a ni ang.

Coach Ange Postecoglou hming chu an champion theih chhanah a ri ring viau a, hemi piah lamah sawi hmaih thiang lo chu inelna hrang hranga goal 30 khung tawh Kyogo Furuhashi a ni.

Duhthlanna neitu

Kyogo hian Chuo University-a lehkha zir chungin football a khel ṭhin a, professional footballer nih chu a tum ber a ni. Mahse, J League club tam takah trial a nei chungin an club tana khel tlak titu a tawng lo a, a beidawng hman hle.

Japanese striker hian in lam chu phone hmanga biain, "Football hi chawlhsan mai ka duh a ni," tiin a hrilh a, a nuin bung deuh taka, "Duhthlanna chu i ta alawm," a lo tih chuan a beng harh zawk.

Kyogo chuan, "Ka â deuh a ni mai thei," tiin sawmna hmu miah lo chunga inkhelh chawlhsan lo tura thutlukna a siam dan chu a sawi a, a nu leh pa ten a tana sum an sen zozai chu a thlawna luan raltir mai a duh lo.

Japanese striker chuan, "Ka chhungten theihtawp chhuaha min thlawpin, lehkha zir chunga football ka khelh theih nan sum tam tak an seng. A hma aia nasa lehzuala bei tura bianga na taka ben ang mai ka ni," a ti a, football khelh chhunzawm a thlang.

Beidawnna hnehtu

Kyogo-a'n football chawlhsan lo turin thutlukna a siam a, a siam sual lo - kum 2017-ah amah duhtu club a hmu a, mahse, a beisei ang erawhin a sang nghal lo. Japan second division club FC Gifu aṭangin a ni.

Hetihlai hian Kyogo hi wing-ah a la khel ṭhin a, a season hmasa berah match 44 khelin goal ruk a khung. Japanese forward hian a season hnihnaah a position a thlak a, mual sir aṭangin a laiah a insawn - hei hi Kyogo tak tak kan hriat ṭanna chu a ni.

Kyogo hian a season hnihnaah match 27 khelin goal 11 a khung a, kum 2018 a lo herchhuah meuh chuan Vissel Kobe an lo lang a, J League club hian Japanese top flight league khel tlakah an ngai.

Japanese striker hian vanneihna a nei - Kobe hi hetihlai hian club indinthar mek an ni a, Japanese sumdawng hausa Hiroshi Mikitani-a'n Andrés Iniesta, David Villa, Lukas Podolski leh Thomas Vermaelen te ho lalutin, sum a ren lo hle.

Zirtirtu Iniesta

Mikitani-a'n hlawhtlin a duh em avangin sum a seng nasa a, manager lah season li chhungin 10-te an nei hman - kum 2019 khan Emperor's Cup-ah champion in, kum 2020 khan Japanese Super Cup an chawi bawk.

Vissel Kobe hian an beisei ber

J League nomawi erawh an chawi thei lo - mahse, heng zawng zawng karah hian player pakhat chuan hmasawn lam a pan reng a, a hming chu Kyogo a ni. Barcelona legend Iniesta-a'n Vissel a zawm chu a chhawr takzet a, player pahnih hi an inman ṭhin hle.

Japan Times football writer Dan Orlowitz chuan, "Vissel hian nuih tihzat chang nei ngun viau mah se, Furuhashi tan chuan Iniesta, Villa leh Podolski te nena khelh ho a, ni tina training ho ringawt pawh chu a hlawk em em a ni," a ti a, Kyogo vanneih thu a sawi.

Orlowitz chuan, "Iniesta hi Kyogo tan chuan zirtirtu a ni a, tun dinhmun a thlen theih nan hian a pui nasa hle. Player pahnih inman bikzia hrilhfiahtu chu, Kyogo a chhuah chiah khan Iniesta hian player dang khatiang taka inman pui kha Vissel-ah hian a nei leh tawh lo," a ti.

Zirlai hlawhtling

Kyogo pawhin Iniesta nena an hun hman hi a hre reng. Japanese striker chuan, "Ani nena kan khelh dun laite kha ka theihnghilh tawh dawn lo a, ka hre reng ang. Training kalte kha a nuam em em a, thil thar hi a awm reng mai a ni.

"Hma ka sawn phah a, nasa takin ka inzir belh. Season kan ṭan hmain Iniesta hian, 'Hahdam takin awm la, a ṭha vek mai ang. Inringtawk takin khel ang che,' min ti a, khelmuala inringtawk taka khel turin min pui nasa hle a ni," a ti.

Kyogo hian dawt a sawi lo - Vissel tan season li chhunga match 111 khela goal 49 khungin, assist vawi 18 a nei a, a tira duhtu nei lo club kha European club-te pawhin an enthlak zingah a awm ta hial.

June 2021 khan Japanese club Yokohama Marinos enkawltu Postecoglou chuan Japan hawisanin Glasgow lam a hawi a, Steven Gerrard-a enkawl Rangers hnuaia kun mek Celtic dinthar turin Scottish football a pan.

Celtic Lal thar chu

Postecoglou-a'n Celtic dinthar turin rin loh takin a kalsan ram lam a hawi a, pound maktaduai 4.6-in Kyogo a lalut. An striker chhuanvawr Odsonne Edouard a chhuah dawn bawk si avangin Celtic hian striker thar an mamawh takzet a, Kyogo chunga beiseina nghah dan tur erawh an la hrethiam lo.

Mahse, Celtic-in an tisual lo - Kyogo hian a season hmasa berah malpui hliam vangin thla thum leh a chanve khelh theih loh lai nei mah se match 33-ah goal 20 ngawt a khung a, Scottish Premier League leh Scottish League Cup-ah a champion pui.

Chu mai a ni lo. Japanese tlangval hi PFA Scotland Team of the Year (Premiership)-ah a lang a, lawm a hlawh zualna pakhat chu game boruak sanga goal a khung ṭhin chu a ni.

January thla khan Rangers lakah hun tawp dawnah draw-na goal a khung a, League Cup final-a an hneh ṭumin goal hnih a khung a, thla hmasaa league-a 3-2 a an hneh ṭumin goal hnih a khung bawk.

Celtic tana hlu

Kyogo hian tun season-ah league leh League Cup nomawi a chawi leh ta a, league bikah match 31-ah goal 24 a khung tawh a, inelna hrang hrangah match 43 khelin goal 30 a khung - season hnih pawh an hman zawh hmain match 76-ah goal 50 a khungsak tihna a ni.

Celtic-in 2016-17 season-a tualchhung nomawi pathum an hui vek ṭuma Moussa Dembele-a'n goal 30 a khung hnua Celtic tana season khata goal 30 khung hmasa ber a ni a, league bikah minute 90 dana goal khung zel ang a ni phak hial.

Scotland midfielder hlui Michael Stewart chuan, "Celtic tan chuan player paiwmawh tawpkhawk a ni. He club a zawm ni aṭang khan thathona nen ṭha takin a khel reng a, Celtic hian an lalut fuh tak zet - chutiang chu a ni zel ang," a ti.

Kyogo hlawhtlinna vang a ni mahna, Celtic hian Japanese player paruk an kawl mek a, Kyogo bakah Yuki Kobayashi, Reo Hatate, Tomoki Iwata, Yosuke Ideguchi leh Daizen Maeda neiin, January khan South Korea striker Hyeongyu Oh an lalut bawk.

Mahse...

Kyogo hi Celtic-ah a tla tlum viau chungin Japan tan erawh koh a ni khat hle - World Cup-ah pawh khan mak takin koh zingah a tel lo a, kum 28 mi a nih ve tawh avangin World Cup khelh chance a nei leh tawh kher lo mai thei.

Mahse, manager Hajime Moriyasu-a'n a squad a puan lai television-a nghakhlel taka lo thlirtu hian chu chu hnual nan a hmang lo a, tunah chuan Celtic player ropui zingah a hming a nem kai mek.

Denmark midfielder Matt O'Riley chuan, "Ka mihring tawn tawha ngainatawm ber," tiin a sawi a, a coach Postecoglou pawhin a fak hle. Postecoglou chuan, "He hmun a lo pan aṭang khan a danglam zar a ni.

"Player lian tak tak, a laka zahngaihna lantir tum hauh lo a hmachhawn fo a, mahse, tihsual a nei ngai lo a, ani hi chu hnehna chang ṭhin mi a ni e," a ti - i hriat ngai loh Kyogo chanchin hi i hre zel dawn e.