Sum ngah Saudi-in player langsar an hip zel

Football khawvela player ropui ber ang hiala tam takin an ngaih Cristiano Ronaldo chuan Al-Nassr tana khelin Saudi Pro League lamah hun a hmang mek a, Ronaldo ai maha ropui zawka ṭhahnem takin an ngaih Lionel Messi pawh Saudi lamin an dawr mek nia sawi a ni.

Hetiang boruak karah hian French goalkeeper langsar Hugo Lloris pawhin Saudi Arabia aṭangin sawmtu a nei a, an club hming tarlan loh chuan a hlawh chu a let thuma tihsan sak an inhuam niin an sawi.

Tottenham Hotspur captain hian Premier League club-ah hian kar khatah £100,000 a hlawh mek a, Saudi pan a, kar khata £300,000 hlawh theihna chance a nei mek - kum 11 zet a khelh tawhna Spurs chhuahsan a hreh lo niin khawthlang media-te chuan an tarlang.

Season thara Champions League khel lo thei dinhmuna ding mek Tottenham hian nipuiah goalkeeper lak thar an duh nia sawi a ni a, mahse, keeper an la thar a nih pawhin Lloris hi a tawnhriat ṭha tak avangin chelh an duh.

Mahse, kum 36 mi keeper hian Tottenham-a number 2 nih ai chuan London club chhuahsan a, a hlawh hnem theihna pan a duh. Lloris hian Spurs-ah nomawi chawi nei lo mah se France chu World Cup 2018-ah khan a champion pui a, 2022 final-ah hruai thleng mah se an chak lo thung.

Lloris hian ram tan match 145 khel tawhin, January khan ram tana inkhelh a chawlhsan thu a puang - February 2012 aṭang khan France captain dinhmun a chelh a, Les Bleus tana inlan hnem ber record a chelh mek bawk.