Match hmasa berah Andy Murray chak lo

Italian Open an khel ṭan chauh a, world number 1 hlui Andy Murray chu tualchhung tlangval Fabio Fognini hneh loin an match hmasa berah a chak lo nghal - inkhel inhnehtawk takah Murray hi 6-4, 4-6, 6-4 in a chak lo.

Fognini hi tun hnaiah a khel ṭha bik lo, kum 14 chhunga a vawi khat nan world ranking sang zual 100 zingah a tel phak lo - tunah hian number 127 a ni mek, anmahni ramah erawh ṭantu mipui a nei tamin a khel ṭha hle.

World number 7 pawh ni tawh Fognini chuan, "Andy nen khan kum 35 mi ve ve kan ni tawh a, set thum khelh pawh kha kan hah pui hle. Tunah chuan match lehpek khel turin hahdam phawt ka mamawh," a ti. Miomir Kecmanovic nen an inkhel leh ang.

Champion lai Novak Djokovic chuan zanin hian a match hmasa ber a khel ve ṭan dawn, world number 1 hian Tomas Etcheverry a hmachhawn ang. Etcheverry hian a match hmasa lamah Luca Van Assche chu 7-6 (9/7), 6-3 in a lo hneh tawh a ni.