Golden State beiseina a la nung

NBA champion lai Golden State Warriors chuan an mikhual Los Angeles Lakers chu 121-106 in an hneh a, inelna neih lai aṭanga tlak mai an la tum bik lo - Western Conference Finals lut turin beisei an la nei zel.

Western Conference Semifinal khelh laiah Golden State hi an che fuh tawk lo, nimin zing inkhelah hian chak lo ni se la chuan an zinkawng a tawp ang. Mahse, Stephen Curry hoa an chak leh tak avangin best of seven series khelh turah 3-2 in an hniam a, an la tla bik lo.

May 13, Inrinni zing dar 7:30 hian Lakers khelmual Crypto.com Arena-ah game 6 an khel dawn. LeBron James leh a ṭhiante tan chak tlang turin hnehna chan a tawk - GSW hi an chak leh thei a nih erawh chuan San Francisco lamah game 7 an khel leh ang.

Nimin zing Chase Center, San Francisco-a inkhelah a tir aṭangin Golden State an che fuh, chetsual chuan zinkawng tawp mai thei an nihna an hrechiang - quarter hmasa pahnihah chungnung nghalin an dinhmun an siam ṭha.

Stephen Curry-a'n point 27 a nei a, point 25 neitu Andrew Wiggins leh Draymon Green (20) te kut a kal bawk. Gary Payton II (13 points), Jordan Poole (11) leh Klay Thompson (10) ten an thawhhlawk bawk.

Quarter thumnaah team pahnih hian point 23 ve ve an hmu a, a bak quarter dang zawngah chuan Golden State Warriors an chungnung vek. Coach Steve Kerr-a'n inkhelh hmain a naute chi chona hautak hmachhawn tura an inpeih thu a sawi a, a sawi ang ngeiin a thleng dik.

Hnehna an chan hnuah Draymond Green chuan, "NBA player ropui berte zinga mi Kerr kaihhruaina hnuaia khel kan ni a, kan danglam leh tlat ṭhin. Hetiang ang hun harsa leh khirh paltlang dan hi chu a hnen aṭangin kan zir thei.

"Coach ruahmanna a fuh a, chubakah chuan a ti hlawhtling turin player an khel ṭha bawk. A bik takin boruak a san zawh pauh leh Stephen Curry hi a ṭha tulh tulh emaw tih mai a tur a ni, a chiai ve ngai lo hi a ṭhatna a ni," tiin a sawi bawk.

Lakers tan James-a'n point 25 a nei a, ani bakah hian Anthony Davis (23) a che ṭha bawk. Mahse, inkhel tawp lamah Kevon Looney nen an intipalh a, lakchhuah a ni. Game 6 a khel thei dawn em tih a chiang lo, a khel thei lo a nih chuan Lakers tan channa lian tak a ni ang.

Eastern Conference semifinal lamah New York Knicks pawh an la him rih. Knick hi Warriors ang bawkin chak lo se la chuan tla thei an ni, mahse Miami Heat lakah 112-103 in hnehna an chang a, series-ah 3-2 in la hniam mah se beiseina an la nei a ni.