Man City chetsual changtu Arsenal

Premier League champion tur a la chiang lo. Hmahruaitu Manchester City leh Arsenal te Pathianni zanah an inlan ve ve dawn - Citizens hian tlak hlau Everton an tum dawn avangin Gunners chuan Toffees an ṭan dawn.

Pathianni zan dar 6:30-ah Pep Guardiola naute hi Everton hmachhawn turin Goodison Park-ah an lut dawn. Man City inkhel result hresain zan dar 9:00-ah Arsenal chuan Brighton an mikhual ve thung ang.

A la tawp lo

Manchester United captain hlui, tuna TV pundit ni ta Gary Neville chuan Manchester City tan chetsual theihna kawng a zau thu leh, an hnuaia awm Arsenal chu champion tura sawibo a la rem loh thu a sawi - EPL chunglam boruak chu a khaikhawm viauin a rinawm.

Guardiola naute hi an league match hnuhnung 10-ah an chak fai vek, an hmabak pali la awmah vawi khat lek chesual zauh pawh ni se an la champion phak tho, nomawi chuh inum chu an kuta awm leh an thunun theih vek a la ni.

Neville thlir dan chuan, league hmahruaitu Man City hi Real Madrid nena match hautak khel hlim an ni a, tuna an hmachhawn tur Everton hi tlak hlau an ni - thih thaa khel tur Toffees hian an match hnuhnungah Brighton 5-1 in an sawp.

Man City tan chuan tun hi season an hman laia fiahna hautak ber a nih a rinawm. Real Madrid nen an intawn leh nghal tur ngaihtuah tel a ngai a, chumi hnuah Chelsea nen an inkhel chhunzawm leh ang. Pep-a'n a naute a siksawi kual ngei a rinawm.

Arsenal hian hun rei tak hma hruai thei mah se a pawimawh laia an chetsual an tuar a, an tan Man City chetsual bak chân theih a ni ta lo - vawi khat chetsual mai ni loin ṭum khat aia tam a ngai a, anmahni an chak vek a ngai bawk; thil theih loh ni lo mah se a harsain a rinawm.

Rinkai City

Man City tan chetsual theihna a ni tih chu hriatsa a ni, chutihrual chiah chuan team dang tan Citizens hi hmachhawn châkawm loh berte zinga mi an ni tho. A bikin Everton hian league match bika an intawn hnuhnung 19-ah vawi khat chiah an hneh.

Everton manager Sean Dyche chuan, "Ka naute hnenah thu hrilh duh pakhat ka nei, chu chu 'point hmu ang' tih mai hi a ni. Stadium khat tlatin Everton ṭantute rawn kalkhawm se, boruak nuam tak hnuaiah player ten point hmu turin an khel ang," a ti.

EPL aṭangin Everton hi an la tla ngai lo, mahse tunah hian 17-na an ni mek; tla thei china awm Leicester City aia an sanna chu point hnih chauh a nih avangin English football inelna sang ber khel zel tur chuan point an mamawh.

Everton lamin theihtawp chhuahin an khel dawn, chumi lo do let tawk turin Guardiola-a'n a naute a rem thiam ang. Man City squad a chhah a, player ṭha neih tam chu tun hi a ṭangkai zual hun a ni dawn - Toffees lakah point hloh an tum lo ang.

Arsenal tlarhnung

Champion beiseina an la neih laiin Arsenal tan thu lawmawm lo tak hriat tur a awm, an defender pahnih William Saliba leh Oleksandr Zinchenko te chu hliam vangin tun season chhung atan an chhawr thei tawh dawn lo.

Takehiro Tomiyasu tan season a tawp tawh bawk - Saliba hmun ruakah Rob Holding leh Jakub Kiwior te an indin chhawk a, a sirah Zinchenko a awm dawn loh takah chuan Kieran Tierney kan hmu leh thung ang.

Mikel Arteta-a'n a duhthusam angin tlarhnung a rem thei dawn lo, an khingpui tur Brighton hi ball in pass thiam leh goal khung harsat lo tak an nih avangin North London club tan fimkhur a ngai dawn hle - European football beisei ngamtu an ni bawk.

Roberto De Zerbi-a naute hi an khelh fuh ni chuan team lian dang hneh turin an ṭha tawk - Kaoru Mitoma, Alexis Mac Allister leh Moises Caicedo te hi ven ngai bik vek an ni a, chutihrualin Leandro Trossard chhuhsak theitu an nih avangin Arsenal hi an buk a rit zawk ang.