Man United-in Wolves mikhual dawn

Manchester United chuan zanin dar 7:30 hian Old Trafford-ah Wolverhampton Wanderers an mikhual dawn. Erik Ten Hag-a hote hian table-ah palina dinhmun la luah mah se an hnuai chiaha awm Liverpool nen an inthlauhna point khat chauh a nih tawh avangin chetsual a thiang tawh lo.

Ten Hag-a hote hian match hnuhnung pahnihah Brighton leh West Ham an hneh lo a, khualmuala inkhelah hian goal an khung loh bakah 1-0 ve vein an chak lo.

Tun hnaia an khelh dan thlirin Man United dinhmun a derthawngin a lang a, chutihrualin Ten Hag-a hote hi Old Trafford-ah chuan record an nei ṭha. Tun season Premier League bikah United hian season ṭantirha Brighton & Hove Albion an muala an hneh loh hnuah Old Trafford-ah tlawm an nei leh tawh lo.

Man United hi an muala Premier League inkhelah chuan a zawnin vawi thum an chak tawh a, Wolves lakah pawh an record duhawm tak hi chhunzawm an tum ang.

Alejandro Garnacho a dam tawh a, Argentine rawlthar hi March thla hnuah a vawi khat nan a inlan theih a beiseiawm. United hian khualmualah Wolves hi Marcus Rashford-a goal hmangin 1-0 in an hneh tawh bawk.

Hei bakah hian Wolves tan thapui senna chhan tur a tam tawh lo. Julen Lopetegui hote hi an him tawh a, season tharah Europe inelnaah an tel thei tawh lo. Chutihrualin Wolves hi zalen takin an khel thei dawn a, Man United tan match hnuhnung bera Aston Villa hnehtu hi zuam ngawt a rem lo.