Rome khawpuiah Roma an chak
AS Roma chuan an club aṭanga inzir chhuak Edoardo Bove-a goal khat hmangin Bayer Leverkusen chu 1-0 in an hneh. Jose Mourinho naute hian Europa League final lut turin kawng dik an zawh.
Ningani zan inkhelah Roma tan Bove hian minute 62-naah goal awmchhun a khung, awmna tur hmun a tlang dik a, a hunah tak a lo awm bawk avangin goal a khung - an chhulchhuak a nih avangin a hlu zual ngei ang.
Jose Mourinho-a'n hliam vangin Stephan El Shaarawy, Chris Smalling, Marash Kumbulla, Diego Llorente leh Rick Karsdorp te a chhawr thei lo a, forward ṭha Paulo Dybala leh midfielder Gini Wijnaldum te pawh bench lamah an ṭhut hmasak a ngai.
Mahse, an ṭhat dan bera an khel lo chungin Roma an chak thei tho - chutihrualin inkhel tir lama Leverkusen tana Florian Wirtz hun ṭha neih a hlauhawm a, goal zawnah a pe lo, keeper Rui Patricio pawhin Robert Andrich khung tur a dansak hlauh bawk.
Hun tawp dawnah pawh Leverkusen lamin Roma keeper Patricio tihsual vangin remchang an hmu, amaherawhchu Jeremie Frimpong khung tur pawh an lo dansak hman hram - second leg an la khelh dawn avangin Bundesliga club hian beisei an la nei sang ngam ang.
Roma coach Mourinho chuan, "Player te khan an hna tlin taka an thawh avangin hnehna kan chang a, fak phu an awm a nih chuan player leh fans an ni, an khel ṭhain khemual sir lam boruak nen a in man ṭha takzet bawk.
"Inkhel awlsam chu a ni lo, a nihna tak chuan thluak inbeihna sang tak a ni. Bayer Leverkusen laka minute 90 chhung thil dang ngaituah miah lo thei ka naute ka chhuang hle," tiin a sawi a, a naute khelh danah a lungawi hle.
Roma khingpui Leverkusen hi Xabi Alonso enkawl an ni a, Spanish manager hi player a nih lai khan Real Madrid tan a khel ṭhin. Real Madrid-ah hian Mourinho-a'n a kaihruai tawh ṭhin a, tunah chuan manager ve ve niin an intawng.
Mourinho chuan, "Player a nih lai khan ka hrechiang tawh a, khelmual chhungah player dangte ho khawmtu leh ralrel thiam a ni daih tawh. Pep Guardiola kha min hriatchhiah tir ṭhin," tiin a player hlui ni ṭhin chu a fak a, coach ṭha tak a nih zel theih ngei a ring bawk.
Leverkusen hian an player ṭha ṭhenkhat Patrik Schick, Karim Bellarabi, Callum Hudson-Odoi leh Andrey Lunev te an chhawr thei bik lo a, second leg an khelh hunah chuan a boruak a danglam tawh ngei ang - Germany rama inkhelh tur an ni tawh dawn.
Xabi Alonso chuan, "Kan result hi lawmna tur chi a ni lo, a chhan chu hnehna changtu nih kan duh. Chak lo mah ila kar lehah kan la intawng leh dawn, inkhel hnuhnung zawkah chuan tihsual neih a thiang lo ang," tiin a sawi.