Juve leh Sevilla inhnehtawk

Juventus chu anmahni khelmual Allianz Stadium-ah ngei mai an tlawm teuh hle, hun pek belh minute sarihnaah (90+7') Federico Gatti chuan an si phurh a sut hram a, an mikhual Sevilla nen 1-1 in an inhnehtawk.

Champions League group stage an paltlang zawh loh avangin team pahnih hian Europa League an khel chhunzawm a ni a, Spanish club Sevilla tan Youssef En-Nesyri chuan minte 26-naah goal a khung.

Mikhual Sevilla lamin hun tam zawk chu inkhel an thunun, mahse a tawpah Old Lady an veng reng thei bik lo. Corner aṭanga ball kal Danilo-a tauh fuh tawk loh chu Paul Pogba-a'n a lo tauh chhawng leh a, yard hnih leka hnaiah Gatti-a'n a tuh lut.

Juventus manager Massimiliano Allegri chuan, "Goal kan chhuah dan kha ven theih a ni, a bik takin counter attack aṭanga min beih khan kan buai mah mah, insiamṭhat kan ngai hle. A tawpah erawh beidawng loa kan beih rah kan seng," a ti.

Second leg chu Seville khawpuiah khelh a ni dawn - Europa League champion lai Sevilla tan final lut turin kawng a inhawng zau zawka ngaih a ni, chutihrualin team pahnih hi tunah chuan an dinhmun a la intluktawk.

Sevilla coach Jose Luis Mendilibar chuan, "Kan tum danah chuan anmahni goal lam hnaihah na taka nawr tawm kha a ni a, kan ti hlawhtling thawkhat viau chuan ka hria. Mahse, goal khat chauh kan khung kha a pawi, hamrik hnuhnung ber a rik hma hi chuan inthlahdah theih a ni lo," a ti.