Suns hnehin Nuggets an tlang

Denver Nuggets chuan Western Conference Finals an lut ta, nimin zing khan Nuggets hian Phoenix Suns chu 125-100 in an hneh a, best of seven series khelh tur chu 4-2 in an la.

Tukin dar 7:30 hian Los Angeles Lakers leh Golden State Warriors an inkhel dawn - Lakers hi an chak a nih chuan conference finals an lut ang. Warriors an chak a nih erawh chuan Chase Center-ah game 7 an khelh ang.

NBA Finals la khel ngai lo Nuggets tan mellung pawimawh phun theihna remchang a ni dawn, chumi hmain Los Angeles Lakers leh Golden State Warriors inkhela chak zawk chu conference fianls-ah an paltlang leh phawt a ngai dawn.

Nimin zing game 6 inkhelah hian Nuggets tan Nikola Jokic chuan point 32 a neih bakah assist vawi 12 neiin rebound ṭum 10 a la bawk - tun series bikah hian vawi thum ngawt triple-double a nei.

Eastern Conference semifinal lamah Boston Celtics chuan Philadelphia 76ers 95-86 in an hneh ve thung a, team pahnih hi series-ah 3-3 in an inhnetawk ta chiah - Pathianni zingah a tlang tur zawk an chingfel ang.

Sixers hian kum 2001 hnu lamah conference finals hi an la thleng ngai lo, game hnuhnung ber an khelhna tur hi Boston khelmual a nih dawn avangin hna a hautak khawp ang - tih theih loh erawh a ni bik lo.

Point 19 neitu Jayson Tatum chuan, "Game 7 kan khel dawn a ni a, hetiang baka nuam leh hlimawm hi a awm thei tawh chuang lo ang," tiin an khelmuala khel tur an nih avangin a phur hle, game hmasa lam an khelh dan thlir erawh chuan fimkhur an ngai dawn.