Chhuak thei dinhmuna ding Mendy

Chelsea keeper Edouard Mendy chu season tawpah chhuak thei dinhmunah a ding. Senegal international keeper Mendy hian Blues hi Champions League hial chawipui tawh mah se tun season-ah Kepa Arrizabalaga tluk loin match 11-ah chiah a la inlan.

Kum 31 mi Mendy hian Stamford Bridge a chhuahsan hmain coach thar thutlukna a la ngaichang dawn a, kar liam ta khan Lian Sports agency hnuaiah a inziaklut. Mendy transfer chungchang hi a agent thar Fali Ramadani-a'n a ngaihtuah zui ang.

Chelsea hian season tharah Mauricio Pochettino an lalut dawn niin a lang a, Tottenham leh PSG manager hlui chungchangah inremna la awm chiah lo mah se inremna a hnai niin sawi a ni.

Tun dinhmunah erawh Frank Lampard hnuaiah an la khelh rih a ṭul a, an match hnuhnung berah Bournemouth 3-1 in an hneh. Chelsea hi Premier League khel zel turin an him tawh a, chutihrualin Europe inelna erawh an tel thei tawh lo.

Zanin dar 7:30 hian Stamford Bridge-ah Nottingham Forest an mikhual dawn a, Forest hi tla thei dinhmuna ding an nih avangin Blues tan khelh an harsa dawn. Steve Cooper-a kaihhruai Forest hian an match hnuhnung berah table mawngphaha awm Southampton chu 4-3 in an hneh a, 'thih leh dam kara' leng an nih tawh avangin Blues nena an inkhel tur pawh boruak a sang ang.