Hun kan khawhral vek - Big Sam

Leeds United chuan vawiin tlai dar 5:00 hian Elland Road-ah Newcastle United an mikhual dawn. Whites hi Sam Allardyce an lak hnuah 19-naah an tla thla a, relegate thei dinhmunah an ding. An khingpui tur Magpies erawh Champions League khelh duh vanga point thum mamawh an ni thung.

Press conference-ah Big Sam hi Newcastle-in hun an khawhral ṭhin thu an zawt a, English manager hian a ngai pawimawh hran lo. Leeds United manager chuan, "Tuin nge hun khawhral lo? Tuin nge sawisel? (Jurgen Klopp leh Mikael Arteta) Anni pawhin hun an khawhral. (Erik ten Hag pawh) Ani pawhin hun a khawhral. Kan vaiin hun kan khawhral vek. Minute nga chauh a awm tawh a, 2-1 a hma kan hruai chuan hun kan khawhral vek ang," tiin a sawi.

Leeds hian Big Sam hnuaia an match hmasa berah champion lai Manchester City an hneh lo a, relegation zone-ah an tlak phah. Newcastle United pawhin champion beiseina la nei Arsenal an hneh bik lo a, Champions League khelh an tumna a derthawng. Team pahnih dinhmun thlirin Elland Road-a inkhel tur hi a boruak a sang ang.