PVL lawmman a pung dawn

Tuakchhung volleyball inelna lian ber Pro Volleyball League a hnai a, lawmman pawisa fai a pung dawn a, a punna tur zat tak erawh puanzar a la ni lo thung.

Nikumah mipa team panga leh hmeichhe team pali an tel a, mimal chawimawina tel loin team tan Rs 4,15,000 sen a ni, hei ai hian kuminah chuan a pung dawn.

Season hmasa aiin kuminah team tel paliin an tam dawn a, June 2 aṭanga 30 chhungin R. Dengṭhuama Indoor Stadium, Mualpuiah khelh a ni ang.

Mipa team ruk - Durtlang North, TNT, Hunthar, Chhinga Veng Spikers, Tuichangral leh Tuipuiral. Hmeichhia team sarih - Bethlehem Vengthlang, Bungkawn, Durtlang, Kanan, Power Department Sporting Club, Armed Veng South leh Luangmual an inel ang.

Working Committee chairman C. Lalrokhuma chuan, "Mizoram pumah volleyball khel an pung zel avangin Pro Volleyball-in kum dang aia ngaihhlut a hlawh phah ka ring a, entu pawh an pun ngei ka beisei. Tun tumah hian kan thawhpui LPS Vision-in sum leh pai enkawlna leh inrelbawlna kawng hrang hrangah thuneihna sang zawk min pe a, Mizoram Volleyball Association tan chona lawmawm tak a ni," a ti.