West Ham tan European final a hnai

Premier League lamah tlak hlauhthawnawmah ding mah se European football lamah chuan West Ham tan mawi takin ni a chhuak zel a, an ke lehlamin Europa Conference League final an rap ta.

Hammers hian Ningani zan khan semifinal first leg-ah AZ Alkmaar chu 2-1 in an hneh a, London Stadium-ah Dutch team tan Tijjani Reijnders chuan goal hmahruai khung mah se Said Benrahma leh Michail Antonio hmangin Hammers hian an chhanglet a ni.

ECL semifinal inkhel dangah pawh goal khung hmasa zawk an chak lo a, Fiorentina chu FC Basel lakah 2-1 in an tlawm - Italian club tan hian Arthur Cabral chuan goal hmahruai khungin, Basel tan Andy Diouf leh Zeki Amdouni te chuan an khung a, an team an chakpui.

May 18 zanah semifinal second leg khelh leh tur a ni a, final lut a la chiang lo - West Ham leh Basel tan final lut tawh lena len a thiang lo.

Hammers tak tak

London Stadium-ah West Ham-in hnehna chan an tum tih a lang a, na takin AZ an nawr nghal - mahse, an beisei ber goal an khung lawk thei lo a, Dutch team tana si ban nghaktu Mat Ryan-a'n Benrahma khung tur nia lang a dansakte chu ṭha tak a ni.

Minute 41-naah mikhual team zawkin goal an khung ta nge nge a, Reijnders chuan box pawn aṭangin goal kilah a khung - Dutch midfielder goal khung chhanah Tomas Soucek chu puh theih a ni a, a tih tur a ti tawk lo.

Mahse, Premier League match thum a zawna an tlawm hnua Manchester United (1-0) hneh thei Hammers an paukhauh a, 1-0 a hnufual chunga chawlhlawk an hmang chungin chak an tum ngam.

Minute 67-naah Hammers vanneih hun a her chhuak - Brighton & Hove Albion keeper hlui Mat Ryan chuan chiang zetin ball an inchuhna lamah Jarrod Bowen a hnek fuh a, penalty a chawi. Benrahma chuan penalty hi goal-ah chantirin, 1-1 a ni.

A tawpah Hammers

West Ham-in si phurh an sut a, an hawikir tawh lo. Minute 75-naah Antonio a inlar ve leh a, Nayef Aguerd-a ball tauh chu Japanese right back Yukinari Sugawara chuan lo dang mah se a per lehlam chu Antonio hian goal-ah a chantir ta tho.

Hammers tan kum 2020-a Brentford aṭanga an lakluh Benrahma a khel ṭha takzet a, Bowen-a hmuhnawm tluan chhuak zak a, Antonio-a'n ngai a awh leh ta a, Declan Rice a rintlak reng bawk.

Pathianni zan dar 6:30-a league match khel tura Brentford lenchilh tur West Ham hian ECL nomawi chawi leh Premier League inhamtang chunga season an khar a nih pawhin a mak lo ang. Mahse, coach David Moyes erawh a la ṭawng fimkhur hle.

Scottish manager chuan, "Goal khatin hma kan hruai a, chu bak a awm lo. AZ chak lohna ang hian chak lo ta ila, engkim a tawp tawhah ka ngai lo ang - chutiang chu a ni mai," a ti a, hnehna an chang thei chu a lawm rualin hmabak hautakin a la hmuah thu a sawi bawk.

Beisei loh Basel

Mizo nulate star rawn ni ṭhin Gabriel Batistuta club hlui a nih vang ringawt pawhin Fiorentina hming hian football fans tam tak chu an lung a tileng ang - mahse, Ningani zan khan Basel an ngam lo.

Fiorentina tan Arthur Cabral chuan minute 25-na lekah goal hmahruai a tauh lut a, Brazilian forward hian tun season ECL bika goal sarih a khungna a ni - mahse, a club hlui Basel zahna avangin a goal khung a lawm lo.

Italian club hian mahni muala khel an nih bawk avangin chak mai an inbeisei hman. Mahse, Swiss Super League club tan Diouf chuan minute 71-naah si phurh sutin, Amdouni chuan hun pek belhah chakna goal a khung zui.

Fiorentina manager Vincenzo Italiano chuan, "Ka ngaihdanah chuan kan khel ṭha a, Basel ang team-te hi chuan an chance neih chhun an chhawr mai ṭhin. Inkhel kan thunun laia kan goal hnihna kan khung vat lo kha a pawi ta a ni," a ti a, second leg-ah Swiss club lehthal an tum ang.