Inter Branch YMA Basketball Vawiinah semifinal khelh a ni dawn

Chhinga Veng Branch YMA-in an branch Diamond Jubilee puala an buatsaih Thanpari Pautu Memorial Inter Branch YMA Basketball Tournament semifinal hmasa zawk chu vawiin tlai dar 5:00 hian Hawla Indoor Stadium-ah Kanan leh Khatla South ten an khel dawn a, zanin dar 8:00-ah Ramhlun North leh Bungkawn te an inkhel bawk ang.

Veng leh veng inelna a nih avangin inkhel entu an ṭhahnem ṭhin a, semifinal inkhel tur thlirin inkhel en a châkawm bawk. Kanan hian semifinal lut tur hian Lalrina Renthlei telna Tuikhuahtlang an hneh a, Khatla South hi team angin an ṭha thung. Ramhlun North hian Matthew Remtluanga Sailo telna Zarkawt an hneh a, final khel tur erawhin hna hautak zawk an hmachhawn dawn - an khingpui tur hi inelna ṭantirha champion rinkai ni pha Bungkawn an ni tlat.