Barcelona an champion tawh dawn?

Pathianni zan dar 12:30-ah Barcelona-in La Liga match an khel dawn a, Catalan derby-ah Espanyol an lenchilh dawn - zan dang zawng aiin Barca tan he inkhel hian danglamna a nei dawn a, an chak chuan La Liga champion an ni dawn!

Barcelona hian an champion tih hre turin Pathianni zan hi an nghah thlen pawh a ngai kher lo mai thei. A chhan maw? Anmahni hnaihtu pahnih Atletico Madrid leh Real Madrid chu Barca hmain an inlan dawn a, team pahnih hi an chak zawh loh chuan Barca an champion nghal dawn.

Real Madrid hian zanin dar 12:30-ah Getafe an mikhual dawn a, Carlo Ancelotti naute hian May 18 zanah Champions League semifinal second leg Manchester City nen an khelh dawn avangin King Carlo-a'n a neih ṭhat ber a chhuahpui kher lo mai thei.

Atletico Madrid-in Pathianni zan dar 7:45-ah second division-a tla chiang tawh Elche an lenchilh dawn a, Real chunga season khar duhin Diego Simeone-a naute hian chak tumin an khel ang.

Barca beiseina

Catalan club Barca-in an vanglai tia chhal theih chu 2005-2019 inkar khan an hmang a, Champions League nomawi pali leh league title 10 ngawt an chawi. Mahse, kum 2019 hnuah Barca an chuai.

Kum 2019 hnua an nomawi chawi leh langsar ber chu 2020-21 season-a Copa del Rey nomawi an chawi kha a ni - hei bak nomawi chawi an nei lo a, Covid-19 hri leng leh an sum dinhmun tlakchhiat a innang zui a, an club chanchina player ropui ber Lionel Messi meuh an chhuahtir.

Mahse, November 2021-a coach ni tura an club legend Xavi an koh kir hnuah Barca an insiamrem a, Spanish coach hian tlarhnungah Andreas Christensen leh Jules Kounde te nena inrem tharin, midfield-ah rawlthar duhawm Pedri leh Gavi ring a, tlarhmaa Robert Lewandowski dah chungin team a din thar mek.

Xavi hoin Spanish Super Cup nomawi an chawi tawh a, La Liga champion leh thei dinhmunah an ding mek bawk - Barca tan khua a var leh ṭan ta, ti ila, thu uar kan ni lo ang.

Champion nomawi

Barca hian tun season-ah league match 33 khel tawhin vawi 26 ngawt an chak thei a, vawi thum chiah la tlawmin vawi li draw an nei - Espanyol laka hnehna an chang a, an champion a nih chuan match li khelh tur la nei chungin an champion dawn tihna a ni.

Kum 2019 hnua league nomawi la chawi leh lo Barca tan chuan tun kar hi kar duhawm a ni thei a, La Liga an champion thei a nih ngat chuan club president Joan Laporta leh a thawhpuite an thaw pawr ve deuh thei ang.

Barca hian an club fachuam Lionel Messi chu Nou Camp-ah koh kir dan an ngaihtuah mek nia sawi a ni a, sum lam buainaah duh angin la insiamrem chiah lo mah se Messi lakluh hi an tan sum siamna ṭha tak a ni tel thei.

Catalan club hian an champion chuan Messi koh kirna chance an nei sang sawt dawn a, La Liga nomawiin a ṭha zawnga an team a nghawng nasat dan tur ngaihtuah hian Espanyol lakah chak an châk zek zek ang.