Manuel Neuer-a'n training a nei

Bayern Munich captain Manuel Neuer chuan training a zawm leh ta a, tun season chhung ngeiin a inlan theih a beiseiawm. Germany leh Bayern no. 1 Neuer hi nikum World Cup zawh khan vur tawlhnaah a chesual a, hun rei tak a chawlh phah.

Bavarians hian Neuer a inhliam avangin Borussia Monchengladbach aṭangin Yann Sommer an lalut a, Swiss keeper hmalam hun a chiang ta lo. German club leh Switzerland no. 1 Sommer te hian inremna an nei niin sawi a ni a, an inremnaah chuan Neuer hi a rawn kir a, no. 1 a nih chhunzawm chuan Sommer hi a chhuak thei ang tih a ni.

Manchester United nen pawha sawizawm Sommer hi nipui bazarah Old Trafford-a kal thei dinhmunah a ding. Tun dinhmunah erawh Bayern tan Bundesliga-ah insawrbing a ṭul a, match thum chauh khelh tur awm tawhah elpui ber Borussia Dortmund aiin point khat chauhin an hmu tam.

Thomas Tuchel-a kaihhruai Bayern hian zanin dar 7:00 hian Schalke an hmachhawn dawn a, Neuer-a chawr chhuahna club Schalke hi tla thei dinhmuna an din avangin Bayern tan pawh khelh an harsa ang. Borussia Dortmund-in zanin dar 10:00-ah Borussia M'gladbach an mikhual ve dawn a, BVB hian Bayern result hre chungin inkhel an hmachhawn thei dawn.