Mizo tlangvalin bronze medal dawng

International Federation of Muaythai Associations (IFMA) Senior World Championships-ah Hunthar veng tlangval Lalngaihawma, Pachhunga University College zirlai chuan bronze medal a dawng. Inelna hi Thailand khawpui Bangkok-ah neih a ni.

India aiawha inlan Mizo tlangval Lalngaihawma hi kum 18-23 inkar inelna, -48kg huangah a inlan. Nimin khan semifinal-ah Iraq tlangval Ako Hama Amin nen an inkhel a, 30-27-a chak zo loin bronze medal-ah a lungawi a ngai.

Championship-ah hian ram 100 chuang aṭangin infiammi 2000 vel an tel a - vawiin hian a hmawr bawk a ni ang. India chuan a pumpuiah bronze medal pathum a la.

Muaythai Association of Mizoram president Brian Lalnunhlima chuan, "Muaythai hi International Olympic Committee (IOC) in a pawm tawh a ni a, chumi infiamna huangah Mizo in medal kan la thei hi a lawmawm hle," tiin Vanglaini a hrilh.

IOC hian infiamna hrang hrang Olympic huangah a telhin paih ṭhen pawh a nei ṭhin. Muaythai hi Paris Olympic 2024 emaw Los Angeles 2028-eh emaw chuan an telh hman tura beisei a ni.

Inelnaah hian Indian aṭangin mi pariat an feh chhuak. An zingah hian medal latu Lalngaihawma bakah referee & judges turin Liansangpuii Renthlei leh Lalhlimpuia te an kal bawk