Zanin dar 8:00-ah Inter Branch YMA Basketball Final Ramhlun North Vs Khatla South

Chhinga Veng Branch YMA-in an branch Diamond Jubilee puala an buatsaih Thanpari Pautu Memorial Inter Branch YMA Basketball Tournament final chu zanin dar 8:00 hian Hawla Indoor Stadium-ah khelh a ni dawn.

Final-ah Ramhlun North leh Khatla South te an inkhel dawn a, basketball hmuhnawm a beisei theih ang. Ramhlun North hian final lut turin champion rikai ni pha Bungkawn 81 - 72 in an sawp.

Veteran player Michael F. Lalawmpuia'n a la ho thei a, US thlenga zuk inzir tawh Lalruatpuia bakah Lawmsangzuala (Spa) leh RD Vanlalhmangaiha (Tabawiha) te an kawl - tawnhriat an nei ṭha tih a chiang. Mahse, Khatla South hi team anga ṭha an ni a, an record-in an theihna hi a sawifiah bawk.

Khatla South hi MBBA 1st Division, MBBA Season Opening Torney leh MRiV Inter veng U21-ah te an champion tawh a, MBBA Cup-ah pahnihna niin MSL hnuhnung berah khan Mizo hlanga khel awmchhun an ni. Tun ṭumah hian Khatla South hian final lut turin Kanan chu 87-85 in an hneh a, MSL hnuhnung bera Rookie of the League H. Lalhmachhuana chu team khaipa a ni a, an hmachhuan tur erawh ṭanrualna a ni ang.

Quarterfinal - May 10, Nilaini
Khatla ‘S’ 95 - 84 Bethlehem VT
Bungkawn 78 - 69 Nursery Veng
Kanan 80 - 70 Tuikhuahtlang
Ramhlun North 98 - 94 Zarkawt

Semifinal - May 13, Inrinni
Kanan 85 - 87 Khatla South
Ramhlun North 81 - 72 Bungkawn

Final - Zanin Inkhel Tur
Ramhlun North 8:00 PM Khatla South