Saints-in Premier League an thlah ta

Kum 11 zet Premier League an khelh hnuah Southampton chuan English top flight league an mangṭha a ṭul ta a, Inrinni zan khan Fulham chuan Premier League-a inhamtan zel an beiseina chu an tihtawpsak - league match 36-ah point 24 chiah an hmu.

Premier League mawngphah luahtu Saints hian Championship lama tla lo turin St. Mary's Stadium-ah tlawm a thiang lo tih an hai lo. Mahse, tun hnaia khel ṭha tak Fulham tan Carlos Vinícius chuan minute 48-naah goal hmahruai khungin, Aleksandar Mitrovic chuan minute 72-naah chak nemnghehna goal a khung zui bawk.

Kum 28 mi Mitrovic hian March thla khan FA Cup quarterfinal-a Manchester United an hneh loh ṭumin referee Chris Kavanagh chu a nam a, hei vang hian match riat hrem a ni. Match riat a inlan loh hnua a inlan lehna hmasa berah bench aṭanga luhtir a ni a, Saints tlak nemnghehna goal a khung zui.

Southampton hian November 7 khan coach Ralph Hasenhüttl chu match 14 aṭanga point 12 chauh an hmuh hnuin an ban a, a aiawha an ruat Nathan Jones chuan league match riatah vawi khat chiah chakpuiin, vawi sarih an tlawm a, assistant Rubén Sellés chuan February 13 khan thlak ve lehin, a inhamtanpui zo ta chuang lo a ni.