Champion lai Golden State hnehtu Lakers

Los Angeles Lakers chuan NBA champion lai Golden State Warriors hnehin NBA Western Conference Finals an lut - LeBron James awmna Lakers hian Denver Nuggets an hmachhawn leh ang.

Inrinni zing game 6 inkhelah Lakers hian 122-101 in hnehna an chang a, best of seven series khelh tur chu Golden State lakah 4-2 a lain an tlang, conference champion ni turin team dang pakhat paltlang an la ngai.

Lakers tan hian James chuan point 30 a nei a, hun harsa leh inkhel pawimawh bikah player danglam a nihna a lantir leh ta a ni. Hliam tenau nei chunga inkhel Anthony Davis chuan point 17 a neih bakah rebound ṭum 20 zet a la bawk.

GSW thiampuipa Stephen Curry-a'n point 32 a nei thung a, point 16 neitu Donte DiVincenzo khel ṭha pangngai ve bawk mah se, player dang zingah point 10 nei tling thei an awm loh avangin an tho chhuak zo lo.

NBA regular season lai khan Lakers hi an che chhe takzet a, kum 65 chhunga season bul an ṭan fuh loh ber ṭum an tawng hial. Playoff khel tur pawhin an tling nghal mai lo, play-in kaltlangin playoff an khel phak hram.

Mahse, inelna boruak a sang tual tual a, team hlun leh tawnhriat nei player danglamna a lang, tunah chuan a vawi 20 nan conference champion nih an beisei bakah a ṭum 18 nan NBA champion nih an tum ngam leh ta a ni.

Los Angeles Lakers leh Nuggets te hian May 17, Nilaini zing dar 6:00 hian Conference Fianls game 1 an khel dawn, best of seven series hmang bawkin chak zawk zawn tur a ni ang.

Eastern Conference lamah Miami Heat chuan New York Knicks chu 96-92 in an hneh a, anni pawh hian 4-2 in series an la. Tun hnai kum 24 chhungin seeded pariatna ni chunga conference finals lut thei hmasa ber an ni hial.

Boston Celtics leh Philadelphia 76ers te erawh 3-3 in an inhnehtawk mek a, nizan zanlai khan game 7 an khel - tukinah chuan a tlang zawk a chiang tawh ang. A chak zawk hian Miami Heat nen conference finals an khel chhunzawm leh ang.