PSG chakna Mbappe, Messi an au el

Paris Saint Germain chuan season an hman ṭhat tawk loh kumah pawh Ligue 1 nomawi an chawi ngei dawn niin a lang ta. Kylian Mbappe goal hnih hmangin an mikhual Ajaccio chu 5-0 in an sawp.

Paris club tan Mbappe bakah hian Achraf Hakimi leh Fabian Ruiz ten goal khat ve ve an khung a, mikhual player Mohamed Youssouf chuan anmahni lamah goal khat a tilut palh bawk.

Hun tawp dawnah PSG defender Hakimi leh Thomas Mangani te chu hnawhchhuah an ni a, player kim loa an khelh hian goal nga a luh fel vek tawh avangin inkhel boruak a tidanglam tam tawh lo.

PSG tan Lionel Messi a inlan a, thu awih loh vanga hrem tawk Messi hi PSG ṭantu ṭhenkhat chuan an au el. Argentina captain hi club phalna la loa a zin avangin match hnih atan hrem a ni.

Mahse, Messi hian a thil tihsualah ngaihdam a dil a, match khat atan hremna hi tihtlem a ni. Tun season tawp ruala contract zo mai tur Messi hi fans ṭhenkhat chuan an ngaidam ve thei rih lo niin a lang.

Christophe Galtier enkawl PSG hian Ligue 1 match 35 aṭangin point 81 an hmu a, pahnihna Lens aiin point rukin an sang zawk - an khelh hmabakah point li an hmuh belh thei a nih chuan, midang result ngaihchan ngai loin a vawi 11 nan an champion ang.