Chelsea manager tur Pochettino

Premier League table laihawla talbuai mek Chelsea chuan season thara an manager atan Mauricio Pochettino an la dawn. Nimin khan London club leh Argentine manager hian inremna an nei a, Tottenham manager hlui hian nipui aṭangin Stamford Bridge-ah thuneihna a chelh ṭan ang.

Chelsea hi Frank Lampard-a'n season tawp thleng a enkawl dawn a, club legend hnuaiah Blues hi an che fuh hleithei lo. Inrinni zan inkhelah pawh an mikhual Nottingham Forest nen 2-2 in an inhnehtawk a, season tharah European football an khel phak dawn lo.

Todd Boehly-a'n thuneihna a chan hnuah player lei nan pound maktaduai 550 chuang an hmang a, khelmualah result ṭha an nei thei chuang bawk si lo. Graham Potter an ban hnuah an result a chhiat zual avangin a manganthlak ve khawp ang.

London club hian insiamṭhat ngei an tum a, an ngaih pawimawh hmasak chu manager ṭha a ni. Football pundit Guillem Balague chuan, "Poch thlirnaah chuan Chelsea ṭantuten Graham Potter an theihngilh tawh dawn a, UCL champion puitu Tuchel pawh an hre reng tawh dawn lo. Tunah chuan manager thar duhin an tuihal a, Argentine manager hian London club zawm hun takah a ngai," tiin a sawi.

Tottenham Hotspur leh Paris Saint Germain pawh enkawl tawhtu Poch hian Chelsea tan June thla aṭangin hna a thawk ṭan ang, a tira inremna an neih tawh angin Lampard chuan tun season chu a enkawl tluan dawn a ni.

Argentina manager Pochettino hian amah pui turin coaching staff a hruai tel dawn a, heng bakah hian bazar dan tur chungchangah club nen hian an la indawr leh dawn nia sawi a ni bawk.

Poch hian Premier League-ah tawnhriat a nei ṭha tawh, mahse Tottenham Hotspur a enkawl ṭum khan Champions League final hial hruai thleng mah se nomawi a chawipui miah lo - Blues tan eng ang takin nge hna a thawh dawn tih chu hunin a la hril ang.