Bayern-in champion an hnaih!

FC Bayern Munich-in DFB Pokal leh Champions League nomawi chan mah se Bundesliga erawh chan an tum lo. Inrinni zan khan Bavarians-in Schalke 6-0 in an sawp a, Thomas Tuchel-a hoten nomawi chawi turin vawi hnih chak chiah an mamawh tawh.

Allianz Arena-a inkhelah Schalke-in mualneitu Bayern kawng engkimah an ngam lo. Minute 21-naah Leroy Sane ball pek chu Thomas Muller-a'n goal kilah tak a pet lut.

Bayern-in minute 29-naah penalty an hmu a, Joshua Kimmich-a'n keeper bum nan a hmang. Second half-ah pawh Bayern tho an chungnung a, Serge Gnabry-a'n minute 50-naah box chhungah rilru fim takin a khung.

Minute 65-naah Gnabry hian Schalke player back pass sual chu um lutin keeper nen lama a paltlang hnuah Bayern goal lina a khung.

Minute 80-naah rawlthar pahnih talent nei ṭha an rawn inlar a, mual vei lam aṭangin Jamal Musiala chuan khalh lutin a ball pek fing tak chu kum 18 mi French forward Mathys Tel-a'n goal-ah a chantir.

Schalke tlarhnung a pawp a, injury time-ah Sadio Mane flick mawi zet chu Noussair Mazraoui-a'n chak nemngheh nan a pet goal.

Bayern hian match 32 aṭangin point 68 a hlawh chhuak a, an khelh hmabaka RB Leipzig leh FC Cologne te an hneh a nih chuan an champion dawn.

Chutihrualin Bayern hi an chesual a nih chuan Borussia Dortmund-in an la hnaih reng. Inrinni zan khan Dortmund hian Borussia Monchengladbach chu 5-2 in an sawp ve bawk. Edin Terzic hote hian Bayern hi point khatin an pha lo a, an hun ṭha an bawhpelh avangin Thomas Tuchel-a hote chetsual an inngahna awmchhun a ni ta.