Number 1 ni turin Alcaraz a chak

Carlos Alcaraz chuan mipa tennis ranking chhuak tharah a chung ber dinhmun a luah dawn. Spanish rawlthar hian Inrinni zan khan Italian Open-ah Albert Ramos-Vinolas a hneh.

Kum 20 mi Alcaraz tan world number 1 ni leh turin Rome khawpuia match khat khelh a tawk a, a khel satliah ni mai loin darkar khat leh minute 26 chhung lekin Ramos-Vinolas 6-4, 6-1 in a hneh.

Alcaraz hian Ramos-Vinolas a hneh avangin ranking point 45 a hmuh belh phawt, tun tournament ṭan hmaah Novak Djokovic a tluk lohna chu point nga chauh a nih avangin a khum dawn a ni.

Serbian star Djokovic hi Italian Open-ah a inlan ve tho a, a match hmasa berah seeded chang phak lo Tomas Martin Etcheverry chu 7-6(5), 6-2 in a hneh, champion lai a nih avangin nomawi chawi leh pawh ni se a ranking point neihsa a humhim dawn chauh a ni.

World number 2 la ni rih Alcarz hian nikum khan US Open nomawi a chawi a, number 1 ni thei naupang ber dinhmun a luah bawk. Mahse, a hnuah hliam vangin a buai zui a, hetih karah hian Djokovic chu a chung berah a lo lawn leh hman.

Djokovic tan pawh Alcaraz hi el tham a ni chho dawn, clay court-a inkhel thiam ni mah se hard court inelna lianah pawh a champion thei a, tun thla chawhnu lama khelh tur French Open-ah pawh anni pahnih hi rinkai an ni dawn.