Milan leh Inter boruak a inang lo!

Italian club ropui pahnih boruak tawn a inang lo mek. AC Milan chu tlau hlau Spezia lakah 2-0 in an tlawm a, season thara Champions League khelh phak an beiseina chu a derthawng ta hle.

Inrinni zan Serie A inkhel dangah Inter Milan chuan Sassuolo 4-2 in an hneh thung. Simone Inzaghi naute hi pathumnaah an inhlangkai a, an chesual viau a nih ngawt loh chuan UCL final an lut bawk ang.

Spezia muala inkhelah Milan hian point an mamawh, mahse Spezia hian point an mamawh ve takzet tho - hun rei tak chhung mahni goal an venhim hnuah Przemyslaw Wisniewski leh Salvatore Esposito te hmangin hun tawp dawnah goal an khung.

Milan an vanduai ve bawk, goal luh hma hian Sandro Tonali leh Brahim Diaz te chuan goal ban an tihper - UCL lama Inter laka an vanduai ang bawkin goal hmaah an vannei tawk tlat lo.

AC Milan coach Stefano Pioli chuan, "Tuna kan chak loh hian kan hma hun na takin a nghawng thei tih kan hria, chuvangin a pawi kan ti takzet. Serie A leh Champions League kan ngaihtuah kawp tih pawh ka hria.

"Tunah chuan Thawhlehni zana Inter Milan nen kan inkhelh tur atan rilru zawng zawng kan hman a ngai," a ti a, 2-0 in hnufual mek mah se an hmelma Inter Milan lehthal theih a la beisei.

Inkhel dangah Inter Milan tan Romelu Lukaku chuan a kum 30 tlin chu goal hnih hmangin a lawm a, forward Lautaro Martinez-a'n a khung belh bakah Ruan Tressoldi chuan anmahni lamah a tilut bawk.

Simone Inzaghi-a'n Champions League lama a chhawr Edin Dzeko chu a hahchawlhtir thung a, striker dang Lukaku pawhin inkhelh a phu tih goal hmangin a lantir - Milan an hmachhawn leh tur atan an inringtawk khawp ang.