Mizo tlangvalten India squad zawm dawn

Hero Intercontinental Cup atana India probable squad-a koh Lallianzuala Chhangte, Jerry Mawihmingthanga leh Lalengmawia Ralte (Apuia) te chuan vawiin hian India squad an zawm dawn a, Bhubaneswar, Odisha-ah training an ṭan ang.

India coach Igor Stimac chuan Intercontinental Cup atan hian player 41 a ko chhin phawt a, Mizo player pathum, ISL hero of the league Lianzuala, Odisha forward Jerry Mawia leh Mumbai City midfielder pawimawh Apuia te hi an tel a ni.

Intercontinental Cup hi June 9 aṭanga khelh ṭan tur niin, Bhubaneswar, Odisha-ah khelh tur a ni. All India Football Federation-in a buatsaih inelnaah hian India bakah Lebanon, Vanuatu leh Mongolia te an tel dawn a, an inkhelh kual vek hnua a sang pahnihin final an khel ang.

Hetihlai hian nakkuma Asian Cup khelh tur atan India hian a awmna tur group a chiang tawh bawk a, Asia khawmualpuia ram leh ram, football hmanga inelna sang ber Asian Cup 2023-a group awm dan tur hi Ningani khan pawh a ni. Blue Tigers hi group B-ah Australia, Uzbekistan leh Syria te nen an awm ho dawn - a awlsam lo ang.

Mahse, Asian Cup-ah hian team 24 an inel dawn a, group parukah team pali zel awma ṭhen hran an ni. Group tin aṭangin a sang pahnih bakah, pathumna ti ṭha zual paliin last 16 an lut dawn a, Blue Tigers tan beiseiawm lo tawp a ni lo.

World Cup 2022 thlengtu Qatar chuan Asian Cup hi a thleng dawn a, khaw lum avangin kum 2023-ah nei loin, January 12 - February 10, 2024-a neih turin ruahmanna siam a ni.