Real Madrid-in Getafe an ngam

Copa del Rey champion Real Madrid chuan Inrinni zan khan league match-ah hnehna an chang a, an mikhual Getafe chu 1-0 in an lo hneh - Marco Asensio chuan inkhela goal awmchhun hi a khung a ni.

Champions League semifinal second leg khelh hmabak Real hian hnehna an chan avangin table-ah pahnihna an ni a, mahse, nizana Atletico Madrid result a zirin he thuziak i chhiar meuh chuan an dinhmun hi a danglam leh ang.

Nizan khan Barcelona chuan Espanyol an lenchilh bawk a, an result kan hre hman lo - hnehna an chan chuan La Liga champion an ni dawn a, he thuziak i chhiar meuh chuan Spanish champion a chiang tawh mai thei.

A ṭha ber lo deuh

Real hian Nilaini zan dar 7:30-ah Champions League semifinal second leg khel turin Manchester City an lenchilh dawn a, first leg-ah 1-1 a an inhnehtawk avangin Etihad Stadium-a lenglut tur team tan a zamawm.

Coach Carlo Ancelotti pawhin hei hi a hrechiang a, an match hnuhnung ber aṭanga player pariat ngawt thlak danglamin, Santiago Bernabeu-a beisei phak lo Eden Hazard pawh inkhel bul ṭan zingah a tel.

Hazard-a tan Getafe laka bul ṭan hi tun season La Liga match-a bul a ṭan ve vawi hnihna chiah a ni a, mahse, Chelsea legend hi minute 61-naah lakchhuah a ni.

Chelh tlak Asensio

Real-in chawlhlawk thlengin goal an khung lo a, Ancelotti-a'n goal hmuh beiseiin player langsar Toni Kroos, Vinicius Junior leh Luka Modric te ho chu bench aṭangin a luhtir - a chhanna hmuhna erawh bul ṭantu Asensio a ni.

Spanish attacking midfielder hian minute 70-naah Lucas Vázquez siamsak chu goal-ah shot-in, defender a per hnuah Getafe keeper David Soria man rual lohin a lut - Asensio hian tun season inelna hrang hrangah match 47 khela goal 11 khungin, assist vawi riat a nei tawh.

Kum 27 mi Asensio hi nipuiah a contract a zawh tawh dawn avangin Aston Villa nen sawizawm mek an ni. Villa hi Barcelona director of football Mateu Alemany chuan nipuiah a zawm dawn a, Alemany hian Asensio hi lakluh a tum dawn nia sawi a ni.