Zaninah LBS Suzuki CYMA Football Pet Hawnna

Mizoram chhunga football inelna ngaihhlut LBS Suzuki CYMA Football chu zanin dar 8:30 hian Vanapa Hall-ah Pet Hawnna neih a ni dawn. CYMA president R. Lalngheta'n pet hawnna a nei ang.

Inelnaah hian team 145 an tel a, zanin hian fixture tlangzarh nghal tur niin organising committee chairman R. Lalrinmawia'n a tlangzarh dawn. MFA honorary secretary leh AIFF League Committee chairman Lalnghinglova Hmar-in (Tetea Hmar) thusawina hun a hmang ang.

Team 145

CYMA Football inelna hi kum 1985 aṭang khan neih ṭan a ni a, team tel tam ber ṭum chu kum 2015 kha niin team 191 zet telin Armed Veng an champion. Kum 2004 khan team 148 an tel a, Ramthar Vengin Armed Veng hnehin a vawi khat nan an champion.

Tun ṭum hi team tel tam lamah pathumna a ni a, champion tur hriatthiam a la har hle. Tun ṭumah hian All Mizoram Inter Village Football Tournament hnuhnung bera champion Champhai Kanan an tel lo a, final-a an khingpui Sialhawk erawh an tel dawn. Lammualah 'Unzi Lasi' a lar thei ang em, tih chu hunin a hril ang.

Inelna hi May 18, Ningani aṭangin khelh ṭan a ni dawn a, ruahman dan chuan final hi June 9, Zirtawpni a khelh tur a ni. Field paruk RG Stadium (Mualpui), Lammual, MAP Ground (Armed Veng), Muallungthu, MFA Ground (Sairang Dinthar) leh Lengpui te hman a ni dawn a, artificial grass vek hman tum ni mah se Ramhlun Sports Complex-ah ni khat khelh a ni ang.

Armed Veng an langsar

CYMA Football record en let chuan Armed Vengin record an nei ṭha fal a, vawi 10 final lut tawhin vawi nga an champion. Electric Veng vawi thum an champion tawh a; Chaltlang, Dinthar leh Ramhlun South te vawi hnih ṭheuh an champion tawh.

Champion hnuhnung ber chu Chanmari an ni a, anni bakah hian Zotlang, Ramthar Veng, Republic Veng, Lengpui leh Kanan Veng te vawi khat ṭheuh an champion tawh. Lengpui chiah hi Aizawl pawn aṭanga champion thei awmchhun an ni.